როგორ მოვუაროთ კონდიციონერს

კონდიციონერი ის მოწყობილობაა, რომელიც ზაფხულის ცხელ დღეებში სახლებსა თუ ოფისებში სიგრილის და სასიამოვნო ტემპერატურის შენარჩუნებაში გვეხმარება.

კონდიციონერმა დიდხანს და უპრობლემოდ რომ იმუშაოს, აუცილებელია, მისი სწორი მოვლა და რეგულარული ყურადღება. შესაბამისად, ამ ბლოგში რამდენიმე მნიშვნელოვან რჩევას გაგიზიარებ.

1. რეგულარულად გაწმინდე კონდიციონერი

კონდიციონერის ფილტრები დიდ როლს ასრულებს ჰაერის სისუფთავესა და აპარატის მუშაობაში.

დაბინძურებული ფილტრებით კონდიციონერი ვეღარ ასრულებს სრულფასოვან ფუნქციას და ამავე დროს, მეტ ენერგიას მოიხმარს.

• ყოველ ორ კვირაში ერთხელ გაწმინდე კონდიციონერის ფილტრი – გარეცხე თბილ წყალში და კარგად გააშრე.
• თუ შენს მოდელს სხვა ტიპის ფილტრი აქვს (მაგალითად, ნახშირბადოვანი ან HEPA ფილტრი), გადაამოწმე მწარმოებლის რეკომენდაციები, შეიძლება საჭირო იყოს მისი პერიოდული შეცვლა.

2. ჩაუტარე პერიოდული ტექნიკური შემოწმება

როგორც ყველა ტექნიკას, კონდიციონერსაც სჭირდება პროფესიონალური მომსახურება. შეიძლება შენ ვერ შეამჩნიო პატარა პრობლემა, რომელიც დროთა განმავლობაში სერიოზულ დაზიანებამდე მიიყვანს აპარატს.

• წელიწადში ერთხელ მაინც მოიწვიე სერტიფიცირებული სპეციალისტი, რომ შეამოწმოს სისტემის საერთო მდგომარეობა, გაზომოს ცირკულაციის წნევა, გაწმინდოს გაგრილების სპირალები და საჭიროების შემთხვევაში, შეავსოს ფრეონით.

3. იზრუნე კონდიციონერის გარე ნაწილის მოვლაზე

თუ შენს კონდიციონერს გარე ბლოკი აქვს, არ დაგავიწყდეს მისი მოვლა.

• გარე ბლოკი უნდა იყოს სუფთა და თავისუფალი ბალახებისგან, ფოთლებისგან ან სხვა დაბინძურებისგან, რათა ჰაერი თავისუფლად მოძრაობდეს.
• რამდენიმე თვეში ერთხელ გაწმინდე გარე ბლოკი რბილი ჯაგრისით ან ფუნჯით. ხოლო განსაკუთრებულად გაასუფთავე ზაფხულის სეზონის დაწყებამდე.

4. მართე სწორად ტემპერატურა

• კონდიციონერის მუშაობისას ტემპერატურის სწორად დაყენებაც მნიშვნელოვანია. როდესაც ძალიან დაბალ ტემპერატურას აყენებ, კონდიციონერი ზედმეტად იტვირთება, რაც აჩქარებს მის ცვეთას.
• ზაფხულში კონდიციონერის ოპტიმალური ტემპერატურაა 24-26°C. ასეთ რეჟიმზე შენს კონდიციონერს გაცილებით ნაკლები დატვირთვა ექნება და ენერგიასაც დაზოგავ.

5. გამოიყენე რეჟიმები გონივრულად

დღევანდელი კონდიციონერები უამრავ ფუნქციას და რეჟიმს გთავაზობს – ეკონომიური რეჟიმი, ღამის რეჟიმი, ტაიმერი და ა.შ.

გამოიყენე ეს რეჟიმები გონივრულად და ნუ დატვირთავ მოწყობილობას საჭიროების გარეშე.

6. არ დატოვო კონდიციონერი დიდი ხნით უყურადღებოდ

თუ სეზონურად იყენებ კონდიციონერს, მაგალითად, მხოლოდ ზაფხულში, ზამთრის პერიოდში ის, შეიძლება, დაზიანდეს უყურადღებობით.

უმოქმედო აპარატში, მტვერი, ტენიანობა და მიკროორგანიზმები გროვდება.

• სეზონის ბოლოს კონდიციონერი კარგად გაწმინდე, თუ შესაძლებელია, გააშრე შიდა ნაწილებიც და დაფარე სპეციალური გადასაფარებლით ან პარკით, რომ მტვრის დაგროვებისგან დაიცვა.

როგორც ხედავ, კონდიციონერის მოვლა არც ისეთი რთულია, როგორც ეს ერთი შეხედვით შეიძლება ჩანდეს. მთავარია ყურადღება და რეგულარული წმენდა. სწორად მოვლის შემთხვევაში, ის მრავალი წლის განმავლობაში იდეალურად მოგემსახურება.

თუ ჯერ არ შეგიძენია, აუცილებლად ეწვიე ექსტრას ვებგვერდს, სადაც კონდიციონერების დიდი მრავალფეროვნება გელოდება.