განახლებულია 04/12/2025

საკონტაქტო ინფორმაცია 

სს „ექსტრა არეა“ 
ს/ნ 402129763 
მისამართი: ქ. თბილისი, პეკინის გამზ. 41, მე-3 სართული
ტელეფონის ნომერი: 032 2 333 111 
ელ ფოსტა: info@extra.ge

წესები და პირობები

წინამდებარე წესები და პირობები არის იურიდიულად სავალდებულო ძალის მქონე დოკუმენტი, რომელიც არეგულირებს ურთიერთობას სს „ექსტრა არეა“-სა და იმ იურდიულ თუ ფიზიკურ პირს შორის, რომელიც სარგებლობს პლატფორმით, როგორც მომხმარებელი. 

რეგისტრაცია და პლატფორმით ნებისმიერი ფორმით სარგებლობის დაწყება ადასტურებს მომხმარებლის სრულ და უპირობო თანხმობას წინამდებარე წესებსა და პირობებზე. 

1. ტერმინთა განმარტება

წინამდებარე წესებსა და პირობებში გამოყენებულ ტერმინებს აქვს ქვემოთ მოცემული მნიშვნელობა:

„ექსტრა“ ნიშნავს სს „ექსტრა არეა“-ს, საიდენტიფიკაციო ნომრით: 402129763, იურდიული მისამართით: 41 პეკინის გამზ., თბილისი, საქართველო.

„პლატფორმა“ ნიშნავს ვებ-გვერდს www.extra.ge-ს და აპლიკაცია EXTRA-ს, რომლის ერთადერთი და კანონიერი მესაკუთრე არის ექსტრა.

„გამყიდველი“ ნიშნავს მოვაჭრეს „მომხმარებლის უფლებების დაცვის შესახებ“ საქართველოს კანონის შესაბამისად. იურდიულ ან ფიზიკურ პირს რომელიც ახორციელებს პლატფორმის საშუალებით პროდუქციის რეალიზაციას. გამყიდვლის შესახებ ინფორმაცია (სახელწოდება, მისამართი, ტელეფონის ნომერი და ელ.ფოსტის მისამართი) ხელმისაწვდომია პროდუქციის დეტალურ გვერდზე.

„მომხმარებელი“ ნიშნავს ნებისმიერი პირს, რომელიც სარგებლობს პლატფორმით, მათ შორის პლატფორმის ვიზიტორებს, ფიზიკურ პირებს რომლებიც ათავსებენ შეკვეთას და იღებენ მომსახურებას. 

„შუამავალი“ ნიშნავს მომსახურების მიმწოდებელ პირს "ელექტრონული კომერციის შესახებ" საქართველოს კანონის შესაბამისად.

„ხელშეკრულება“ ნიშნავს წინამდებარე წესებსა და პირობებს, რომლის საფუძველზეც მომხმარებელი ახორციელებს შეძენას პლატფორმაზე. 

2. ძირითადი დებულებები

პლატფორმა არის ონლაინ ვაჭრობის სივრცე, რომლის საშუალებითაც გამყიდვლებს ეძლევათ შესაძლებლობა შესთავაზონ და გაყიდონ სხვადასხვა პროდუქცია, ხოლო მომხმარებლებს - შეიძინონ აღნიშნული პროდუქცია საქართველოს მასშტაბით. 

პროდუქციის დეტალურ გვერდზე მითითებულია ინფორმაცია გამყიდვლის თაობაზე, კერძოდ: სახელწოდება, იურდიული მისამართი, ტელეფონის ნომერი და ელ.ფოსტა. ასევე გამყიდვლის მიერ დადგენილი დამატებითი პირობები (ასეთის არსებობის შემთხვევაში). 

ექსტრა ვალდებულია უზრუნველყოს გამყიდვლის თაობაზე პლატფორმაზე გამოქვეყნებული ინფორმაციის სიზუსტე და განახლება საჭიროებისამებრ, იმ ფარგლებში რამდენადაც ასეთი ინფორმაცია მიეწოდება ექსტრას გამყიდვლის მიერ. 

იმისთვის, რომ მომხმარებელს ჰქონდეს საშუალება მოახდინოს პირდაპირი, სწრაფი და ეფექტური კომუნიკაცია გამყიდველთან შეკვეთის, მიწოდების ან პროდუქციის დაბრუნების საკითხებზე შეკვეთის გვერდზე, ინტეგრირებულია სპეციალური საკომუნიკაციო არხი (ე.წ. ჩატი), რომლის გამოყენებითაც შესაძლებელია მომხმარებლისა და გამყიდველის ურთიერთობა წერილობითი ფორმით პლატფორმის შიგნით.

ექსტრა მოქმედებს როგორც შუამავალი მოვაჭრესა და მომხმარებელს შორის და არ არის პროდუქციის უშუალო გამყიდველი, გარდა იმ შემთხვევისა თუ პროდუქციის გვერდზე მითითებულია, რომ ექსტრა არის გამყიდველი. 

ექსტრა პასუხისმგებელია მხოლოდ იმ ზიანზე, რომელიც გამოწვეულია პლატფორმის ტექნიკური ან ფუნქციური გაუმართაობით, რის შედეგადაც მოხდა მომხმარებლის ან მომსახურების მიმღების უფლებ(ებ)ის დარღვევა, როგორც ეს გათვალისწინებულია საქართველოს კანონებით „მომხმარებლის უფლებების დაცვის შესახებ“ და „ელექტრონული კომერციის შესახებ.“

3. მომხმარებლის ანგარიში

ექსტრას მომსახურებით სრულყოფილად სარგებლობისთვის აუცილებელია ანგარიშის (პროფილი) შექმნა. ანგარიშის გასახსნელად მომხმარებელი უნდა მიჰყვეს პლატფორმაზე განთავსებულ ინსტრუქციას: მიუთითოს მოთხოვნილი ინფორმაცია და საჭიროებისამებრ, გაიაროს ვერიფიკაცია.

ანგარიშის შექმნამდე მომხმარებელი უნდა დარწმუნდეს, რომ აღნიშნულით არ ირღვევა საქართველოს კანონმდებლობა და მესამე პირთა უფლებები.

ანგარიშის შექმნის დროს მითითებული მონაცემების სიზუსტეზე სრული პასუხისმგებლობა ეკისრება მომხმარებელს.

პლატფორმაზე ზოგიერთი პროდუქტის შეძენა დასაშვებია მხოლოდ სრულწლოვანი პირების მიერ. შესაბამისად, ზოგიერთი შეკვეთის განსათავსებელად შესაძლოა საჭირო იყოს მშობლის ან მეურვის ჩართულობა, თუ მომხმარებელი არის არასრულწლოვანი.

ექსტრა უფლებას იტოვებს დამატებით მოთხოვოს მომხმარებელს პლატფორმაზე მითითებული მონაცემების სიზუსტის დადასტურება. მომხმარებლის მონაცემები დამუშავდება ექსტრას კონფიდენციალურობის პოლიტიკისა და კანონმდებლობის შესაბამისად.

ექსტრაზე მომხმარებლებს შესაძლებლობა აქვთ გაიარონ რეგისტრაცია და შექმნან ანგარიში Google-ს ან Facebook-ის გამოყენებით. ასეთ შემთხვევაში მომხმარებელი დამატებით უნდა დაეთანხმოს Google-სა და Facebook-ის მიერ მითითებულ წესებსა და პირობებს, რომლის დაცვაზეც პასუხისმგებლობა ეკისრება მომხმარებელს.

ანგარიშის დეტალების უსაფრთხო შენახვაზე პასუხისმგებლობა ეკისრება მომხმარებელს. იმ შემთხვევაში თუ მომხმარებელს აქვს ეჭვი, რომ მესამე პირს აქვს მისი ანგარიშის დეტალები, მომხმარებელი ვალდებულია დაუყონებლივ შეცვალეს იგი ან დაუკავშირდეს ექსტრას.

მომხმარებელი პასუხისმგებელი ყველა ქმედებაზე, რომელიც განხორციელებულია მისი ანგარიშის მეშვეობით, მიუხედავად იმისა, თავად ასრულებდა თუ არა იგი ამ ქმედებას. 

ექსტრა უფლებამოსილია ტექნიკური ან/და უსაფრთხოების მიზნით, მათ შორის თაღლითური ან საეჭვო აქტივობის გამოვლენის შემთხვევაში ან/და საქართველოს კანონმდებლობის ან წინამდებარე დოკუმენტის უხეშად დარღვევის შემთხვევაში დროებით ან სამუდამოდ დაბლოკოს/გააუქმოს ანგარიში.

4. შეკვეთა

პლატფორმაზე შეკვეთის განთავსება შესაძლებელია მხოლოდ რეგისტრირებული მომხმარებლებისთვის. შეკვეთის განთავსების მიზნით, მომხმარებელი უნდა მიჰყვეს პლატფორმაზე მითითებულ ინსტრუქციებს და შეავსოს მოთხოვნილი ველები.

შეკვეთის საბოლოო განთავსებამდე მომხმარებელს ეძლევა შესაძლებლობა გადაამოწმოს შეკვეთის დეტალები და საჭიროებისამებრ შეიტანოს ცვლილებები, მათ შორის შეასწოროს შეცდომები, ასეთის არსებობის შემთხვევაში. 

მომხმარებლის მიერ შეკვეთის ელექტრონული ფორმით განთავსებისთანავე, იგი პლატფორმის ან შესაბამისი საკომუნიკაციო არხის (ელ.ფოსტის ან ელექტრონული შეტყობინების) საშუალებით იღებს დასტურს შეკვეთის მიღების შესახებ.

შეკვეთის მიღების შემდეგ, გამყიდველი ახორციელებს მის დამუშავებას. იმ შემთხვევებში, თუ შეკვეთილი პროდუქცია არ იქნება ხელმისაწვდომი მარაგების არქონის გამო ან იარსებებს სხვა ობიექტური გარემოება, გამყიდველი უფლებამოსილია გააუქმოს შეკვეთა. გამყიდვლის მიერ შეკვეთის გაუქმება დასაშვებია მისი მიღებიდან 2 (ორი) სამუშაო დღის ვადაში. შეკვეთის გაუქმების შემთხვევაში მომხმარებელს დაუყოვნებლივ ეცნობება აღნიშნულის თაობაზე პლატფორმის ან სხვა საკომუნიკაციო საშუალებით.

ექსტრა უფლებას იტოვებს გააუქმოს შეკვეთა იმ შემთხვევებში, როდესაც არსებობს შეკვეთის გაუქმების ობიექტური საფუძველი, მათ შორის თაღლითური ან საეჭვო ოპერაციის გამოვლენა, პროგრამული ან ტექნიკური ხარვეზი, მონაცემთა შეცდომა ან სხვა მსგავსი გარემოება.

მომხმარებელს უფლება აქვს პასუხისმგებლობის დაკისრების გარეშე გააუქმოს შეკვეთა ნებისმიერ დროს მანამ, სანამ მოხდება პროდუქციის ტრანსპორტირება მომხმარებლამდე (მიწოდების დაწყება).

შეკვეთის სტატუსის შესახებ ინფორმაცია (მათ შორის, ინფორმაცია მიწოდების დაწყების თაობაზე) მომხმარებელბისთვის ხელმისაწვდომია შეკვეთის გვერდზე, პლატფორმის პირად კაბინეტში. 

5. გადახდის მეთოდები

პლატფორმაზე შეკვეთის ღირებულების გადახდა შესაძლებელია შემდეგი გზებით:

• საქართველოს ტერიტორიაზე მოქმედი ბანკების ბარათით;
• ბალანსით;
• კურიერთან ანგარიშსწორებით (მხოლოდ იმ შემთხვევებში, როცა აღნიშნული პირდაპირ მითითებულია შეკვეთის გვერდზე).

ბალანსის შევსება შესაძლებელია როგორც ექსტრას მიერ (მაგალითად, ერთგულების პროგრამის ფარგლებში ან სხვა მიზეზით დამატებითი სარგებლის დარიცხვისას), ასევე მომხმარებლის მიერ დამოუკიდებლად. ბალანსზე განთავსებული თანხა შეიძლება გამოყენებულ იქნას მხოლოდ შეკვეთის ღირებულების დასაფარად. მომხმარებელი არ არის უფლებამოსილი მოითხოვოს ბალანსზე არსებული თანხის განაღდება.

ანგარიშის გაუქმების შემთხვევაში, მომხმარებლის ბალანსი ავტომატურად ნულდება. შესაბამისად, ანგარიშის გაუქმებამდე რეკომენდირებულია ბალანსზე არსებული თანხის სრულად გამოყენება.

იმ შემთხვევაში თუ ანგარიში უქმდება ექსტრას ინიციატივით, მომხმარებელი უფლებამოსილია მოითხოვოს ბალანსზე არსებული ღირებულების დაბრუნება ანგარიშის გაუქმებიდან 3 (სამი) თვის ვადაში. ექსტრა ვალდებულია დაუბრუნოს ბალანსზე არსებული ღირებულება მომხმარებელს იმავე ფორმით, რა ფორმითაც იქნა ღირებულება განთავსებული ბალანსზე. 

გარდა ამისა, ექსტრას შეუძლია ბალანსის განულება, იმ შემთხვევაში თუ ის გარკვეული პერიოდის განმავლობაში არის პასიური. ასეთ შემთხვევაში, ექსტრა მომხმარებელს წინასწარ, არანაკლებ 3 (სამი) თვით ადრე აცნობებს ბალანსის განულების შესახებ. 

ზოგიერთ შეკვეთაზე შესაძლებელია განვადებით ან მსგავსი ფორმით გადახდა — ამ შემთხვევაში მომხმარებელმა უნდა მიჰყვეს პლატფორმაზე მითითებულ ინსტრუქციებს. მომხმარებელსა და შესაბამის ბანკს შორის ურთიერთობა რეგულირდება ბანკთან გაფორმებული ხელშეკრულებით.

6. შეკვეთის მიწოდება

მომხმარებლამდე შეკვეთილი პროდუქციის ტრანსპორტირებას უზრუნველყოფს გამყიდველი პირადად ან კონტრაქტორი საკურიერო კომპანიის მეშვეობით. 

ტრანსპორტირების დროს პროდუქციის დაზიანებაზე პასუხისმგებლობა ეკისრება გამყიდველს. პროდუქციის დაზიანების რისკი მომხმარებელს გადადის შეკვეთის ჩაბარების შემდეგ. 

შეკვეთის ჩაბარების დრო დამოკიდებულია მომხმარებლის მიერ არჩეულ მიწოდების მისამართზე. სტანდარტულად თბილისში შეკვეთის ჩაბარება ხორციელდება 1-4 სამუშაო დღის ვადაში, ხოლო რეგიონებში 1-7 სამუშაო დღის ვადაში. 

შეკვეთის ჩაბარების სავარაუდო დროის შესახებ მომხმარებელს ინფორმაციის მიღება შეუძლია შეკვეთის განთავსების დროს, შეკვეთის გვერდზე. გამყიდველი იღებს ვალდებულებას, რომ შეკვეთის ჩაბარებას უზრუნველყოს შეკვეთის გვერდზე მითითებულ ვადაში, რომელიც არ აღემატება თბილისში 1-4 სამუშაო დღეს, ხოლო რეგიონში - 1-7 სამუშაო დღეს. 

იშვიათ შემთხვევაში გამყიდველს შეიძლება დასჭირდეს იმაზე მეტი დრო (მაგრამ არაუმეტეს 30 კალენდარული დღე) შეკვეთის ჩასაბარებლად, ვიდრე ეს განსაზღვრულია წინამდებარე წესებით და პირობებით, რის შესახებაც პროდუქციის შეძენამდე/შეკვეთის განთავსებამდე, წინასწარ ეცნობება მომხმარებელს.
საკურიერო მომსახურება ხორციელდება მომხმარებლის მიერ შეკვეთაში დაფიქსირებულ მისამართზე. იმ შემთხვევაში თუ შეკვეთის წონა არის 20 კგ-ზე ნაკლები, შეკვეთის მიტანა განხორციელდება კარამდე. ხოლო იმ შემთხვევაში თუ შეკვეთის წონა არის 20 კგ და მეტი, შეკვეთის მიტანა განხორციელდება სადარბაზოს კარამდე (ანუ არ განხორციელდება შეკვეთის ატანა კიბეებზე და ა.შ.).

შეკვეთის ჩაბარების დროს, მომხმარებელი ვალდებულია შეამოწმოს პროდუქცია და დარწმუნდეს, რომ იგი შეესაბამება შეკვეთას და არ აქვს ვიზუალური ნაკლი. შეკვეთის ჩაბარების დრო გამყიდვლის წარმომადგენელმა შესაძლოა განახორციელოს შეკვეთის/პროდუქციის დასურათება მომხმარებლის თანდასწრებით. 

იმ შემთხვევაში თუ პროდუქციას აქვს ვიზუალური ნაკლი ან იგი არ შეესაბამება შეკვეთას (მათ შორის, ე.წ. არასრული შეკვეთა) მომხმარებელმა იგი არ უნდა ჩაიბაროს და დაუყონებლივ დაუკავშირდეს გამყიდველს პროდუქციის გვერდზე მითითებულ ნომერზე ან ჩატის საშუალებით.

7. კანონისმიერი გარანტია

კანონისმიერი გარანტიის პირობები ვრცელდება მხოლოდ იმ მომხმარებლებზე, რომლებიც არიან ფიზიკური პირები.

თუ პროდუქცია ნაკლის მქონე აღმოჩნდა, მომხმარებელს უფლება აქვს, გამყიდველს მოსთხოვოს ნაკლის აღმოფხვრა (პროდუქციის უსასყიდლოდ შეკეთება ან შეცვლა, ფასის შემცირება) ან გავიდეს ხელშეკრულებიდან. 

პროდუქციის  შეკეთება და შეცვლა მომხმარებლის პირველი რიგის უფლებებია. მომხმარებელს უფლება აქვს, გამყიდველს მოსთხოვოს პროდუქციის უსასყიდლოდ შეკეთება ან შეცვლა, გარდა იმ შემთხვევისა, როდესაც ეს, პროდუქციის ბუნებიდან გამომდინარე, შეუძლებელია ან არათანაზომიერ ან შეუსაბამოდ დიდ ხარჯს მოითხოვს.

პროდუქცია შეკეთებული ან შეცვლილი უნდა იქნეს გონივრულ ვადაში, ისე, რომ მომხმარებელს არ შეექმნას მნიშვნელოვანი შეფერხება პროდუქციის ბუნებისა და იმ მიზნის გათვალისწინებით, რომლისთვისაც მან ეს პროდუქცია შეიძინა.

პროდუქციის უსასყიდლოდ შეკეთება ან შეცვლა გულისხმობს გამყიდვლის მიერ ყველა ხარჯის (მათ შორის, ფოსტის, სამუშაო ძალისა და მასალების ხარჯების) გაწევას, რომლებიც საჭიროა პროდუქციის ხელშეკრულებით გათვალისწინებულ პირობებთან შესაბამისობის უზრუნველსაყოფად.

მომხმარებელს უფლება აქვს, მოითხოვოს პროდუქციის ფასის შემცირება ან უარი თქვას ხელშეკრულებაზე, თუ არსებობს ერთ-ერთი შემდეგი პირობა:

- პროდუქციის შეკეთება ან შეცვლა შეუძლებელია;

- გამყიდველმა პროდუქცია გონივრულ ვადაში არ შეაკეთა ან არ შეცვალა და მომხმარებელმა ხელშეკრულების შესრულებისადმი ინტერესი დაკარგა;

- გამყიდველის მიერ პროდუქციის შეკეთება ან შეცვლა მომხმარებელს მნიშვნელოვან შეფერხებას შეუქმნის.

მომხმარებელს უფლება აქვს, ხელშეკრულებიდან გასვლის შემთხვევაში მოითხოვოს ხელშეკრულების შეუსრულებლობით მიყენებული ზიანის ანაზღაურება საქართველოს კანონმდებლობით დადგენილი წესით.

მომხმარებელს არ აქვს უფლება, უარი თქვას ხელშეკრულებაზე, თუ პროდუქციის ნაკლი უმნიშვნელოა.

იმის განსაზღვრისას, თუ რამდენად არათანაზომიერია ან შეუსაბამოდ დიდია ხარჯი, გათვალისწინებული იქნება შემდეგი პირობები:

- პროდუქციის ფასი მისი ხელშეკრულებით გათვალისწინებულ პირობებთან შესაბამისობის შემთხვევაში;

- პროდუქციის ხელშეკრულებით გათვალისწინებულ პირობებთან შეუსაბამობის ხარისხი;

- პროდუქციის ნაკლის მომხმარებლისთვის შეფერხების შექმნის გარეშე აღმოფხვრის ალტერნატიული შესაძლებლობა.

მომხმარებელს უფლება აქვს, ისარგებლოს ზემოხსენებული უფლებებით, თუ პროდუქციის ნაკლი პროდუქციის მისთვის გადაცემიდან 2 წლის განმავლობაში აღმოჩნდა.

თუ მომხმარებელმა პროდუქციის ნაკლი მისი მფლობელობაში მიღებიდან 6 თვის განმავლობაში აღმოაჩინა, საწინააღმდეგოს დამტკიცებამდე იგულისხმება, რომ ნაკლი არსებობდა პროდუქციის მიწოდებისას, თუ, პროდუქციის ბუნებიდან ან ნაკლის ხასიათიდან გამომდინარე, ეს შესაძლებელია. ამ შემთხვევაში მტკიცების ტვირთი გამყიდველს ეკისრება. თუ მომხმარებელმა პროდუქციის ნაკლი პროდუქციის მფლობელობაში მიღებიდან 6 თვის შემდეგ აღმოაჩინა, იმის მტკიცების ტვირთი, რომ ნაკლი არსებობდა პროდუქციის მიწოდებისას, მომხმარებელს ეკისრება.

მომსახურებასთან დაკავშირებული გარანტიები

ექსტრა იღებს ვალდებულებას, რომ გაუწევს მომსახურებას მომხმარებელს საქართველოს კანონმდებლობის შესაბამისად. მომსახურებაში იგულისხმება საშუამავლო მომსახურება, როდესაც ექსტრა არის შუამავალი მომხმარებელსა და გამყიდველს შორის.  

იმ შემთხვევაში თუ გაწეული მომსახურეობა არის ნაკლიანი ან გადაცილებულია ვადა, მომხმარებელმა უნდა განუსაზღვროს ექსტრას მომსახურების გაწევის/ნაკლის აღმოფხვრის გონივრული დამატებითი ვადა, გარდა იმ შემთხვევისა, როდესაც ეს, მომსახურების ბუნებიდან გამომდინარე, შეუძლებელია ან არათანაზომიერ ან შეუსაბამოდ დიდ ხარჯს მოითხოვს, როგორც ეს გათვალისწინებულია კანონმდებლობით.

დამატებითი ვადის უშედეგოდ გასვლის შემთხვევაში მომხმარებელს უფლება აქვს:

- ექსტრას ხარჯით მომსახურების გაწევა ან ნაკლის აღმოფხვრა სხვა პირს შესთავაზოს.

- მოითხოვოს მომსახურების ფასის ადეკვატური შემცირება (თუ მომსახურების ფასი განსაზღვრულია);

- უარი თქვას ხელშეკრულებაზე და მოითხოვოს ზიანის ანაზღაურება საქართველოს კანონმდებლობით დადგენილი წესით.

დამატებითი ვადის განსაზღვრა სავალდებულო არ არის, თუ აშკარაა, რომ ამას არავითარი შედეგი არ ექნება, ან მომხმარებელმა ხელშეკრულების შესრულება მომსახურების დროულად მიღებას დაუკავშირა.

კომერციული გარანტია

კონკრეტულ პროდუქციას კანონისმიერ გარანტიასთან ერთად შეიძლება გააჩნდეს კომერციული გარანტია, რომლის შესახებაც მითითება გაკეთებული იქნება პროდუქციის აღწერაში. 

კომერციული გარანტია არ ზღუდავს კანონისმიერი გარანტიის პირობებს. წინააღმდეგობის შემთხვევაში უპირატესობა მიენიჭება კანონისმიერ გარანტიას. 

აუცილებელია მომხმარებელმა შეკვეთის განთავსების დროს მიუთითოს მოთხოვნილი ინფორმაცია სრულად და ამომწურავად, რადგანაც აღნიშნული ინფორმაცია გამოყენებული იქნება კომერციული გარანტიის ტალონის გაცემის დროს. არასწორი/არაზუსტი ინფორმაციის მითითების შემთხვევაში კომერციული გარანტიის პირობა შესაძლოა გაუქმდეს გამყიდვლის მიერ. 

დაბრუნების პოლიტიკა

„მომხმარებლის უფლებების დაცვის შესახებ“ საქართველოს კანონის მე-13 მუხლის თანახმად, მომხმარებელს უფლება აქვს, ყოველგვარი საფუძვლის მითითების გარეშე თქვას უარი ხელშეკრულებაზე და უკან დააბრუნოს პროდუქცია 14 კალენდარული დღის განმავლობაში, რომელიც აითვლება პროდუქციის მიღებიდან.

აღნიშნული მოთხოვნის სარგებლობისთვის მომხმარებელი ვალდებულია შეკვეთების ისტორიის გვერდზე დააფიქსიროს მოთხოვნა დაბრუნებაზე. 

 პროდუქციის დაბრუნების შემთხვევაში მომხმარებელი ვალდებულია:

- გამყიდველს ან მის მიერ განსაზღვრულ მესამე პირს დაუბრუნოს პროდუქცია დაბრუნების შესახებ შეტყობინების გაგზავნის შემდეგ დაუყოვნებლივ, მაგრამ არაუგვიანეს 7 კალენდარული დღისა.

- გასწიოს პროდუქციის დაბრუნებასთან დაკავშირებული პირდაპირი (უშუალო) ხარჯი.

- პროდუქციის დაბრუნება უნდა განხორციელდეს გამყიდვლის მისამართზე. 

იმ შემთხვევაში, თუ პროდუქციის მახასიათებლები არ შეესაბამება პლატფორმაზე მითითებულ მონაცემებს, პროდუქციას გააჩნია თავდაპირველი ნაკლი ან დაზიანებულია, პროდუქციის უკან დაბრუნებას უზრუნველყოფს გამყიდველი თავისი რესურსით.

მომხმარებელი ვალდებულია სრულად დააბრუნოს პროდუქცია ყველა თანდართულ დოკუმენტთან ერთად.

გამყიდველი ვალდებულია პროდუქციის უკან დაბრუნების შეტყობინების მიღებიდან მაქსიმუმ 14 კალენდარული დღის განმავლობაში, უკან დაუბრუნოს მომხმარებელს მის მიერ გადახდილი თანხა. გამყიდველს უფლება აქვს, უარი თქვას თანხის დაბრუნებაზე მანამ, სანამ პროდუქციას არ დაიბრუნებს ან მომხმარებლისგან არ მიიღებს პროდუქციის გაგზავნის დამადასტურებელ დოკუმენტს, იმის მიხედვით, რომელიც უფრო ადრე განხორციელდება.

თანხის ანაზღაურება მოხდება გადახდის იმავე საშუალებებით, რომლებიც მომხმარებელმა გამოიყენა, გარდა იმ შემთხვევისა, როდესაც მომხმარებელი გადახდის სხვა საშუალების გამოყენებაზე თანხმობას განაცხადებს.

მომხმარებლის მიერ პროდუქციაზე უარის თქმა ავტომატურად იწვევს დაკავშირებული ხელშეკრულებიდან მის გასვლას და პირვანდელი მდგომარეობის აღდგენას.

მომხმარებელს არ აქვს უფლება, უარი თქვას ხელშეკრულებაზე და უპირობოდ დააბრუნოს პროდუქტი, თუ: 

- მიწოდებული პროდუქციის ფასი დამოკიდებულია ფინანსურ ბაზარზე არსებულ ცვლილებაზე, რომელსაც გამყიდველი ვერ აკონტროლებს და რომელიც წარმოიშვა წინამდებარე დოკუმენტით დადგენილ ვადაში.

- პროდუქცია მომხმარებლის ინდივიდუალური შეკვეთით არის დამზადებული/შესრულებული.

- მიწოდებული პროდუქცია მალფუჭებადია ან მას მოკლე ვარგისობის ვადა აქვს.

- მომხმარებელს მიეწოდა ჰერმეტულად დაცული პროდუქცია, მისი ჰერმეტულობა მიწოდების შემდეგ დაირღვა და, ამდენად, პროდუქციის დაბრუნება შეუძლებელია ჯანმრთელობის ან ჰიგიენური ნორმების დაცვის გამო.

- მიწოდებული პროდუქცია მიწოდების დროს, მისი მახასიათებლებიდან გამომდინარე, განუყოფლად შეერწყა სხვა პროდუქციას. 

- დალუქული აუდიო ან ვიდეოჩანაწერი ან პროგრამული უზრუნველყოფა და მისი ლუქი მიწოდების შემდეგ დაირღვა.

- ჟურნალ-გაზეთები ან სხვა სახის პერიოდული გამოცემა.

- მომხმარებელმა საჯარო აუქციონის შედეგად შეიძინა პროდუქცია. 

- მომხმარებელს ციფრული შინაარსი მიეწოდა არამყარი მატარებლით და ხელშეკრულების შესრულება მომხმარებლის წინასწარი თანხმობით დაიწყო.

- 30 ლარამდე ღირებულების პროდუქცია. 

აქციები/ფასდაკლებები

დროდადრო ექსტრაზე მოქმედებს აქცია/ფასდაკლება.

აქციით/ფასდაკლებით სარგებლობა შეუძლიათ მხოლოდ რეგისტრირებულ მომხმარებლებს.

აქციის პირობები განისაზღვრება ინდივიდუალურად. 

მომხმარებელი აქციაში ჩართვამდე დეტალურად უნდა გაეცნოს მის პირობას პლატფორმის საშუალებით.

აქციაში ჩართვა ავტომატურად ნიშნავს, რომ მომხმარებელი ეთანხმება მას.

ინტელექტუალური საკუთრების უფლება

მომხმარებელმა არ უნდა განახორციელოს ისეთი ქმედება, რაც ხელყოფს პლატფორმის ან ნებისმიერი მესამე მხარის მფლობელობაში არსებული ინტელექტუალური საკუთრების უფლებებს. პლატფორმის კონტენტის ნებისმიერი რეპროდუქცია, განცხადება, გავრცელება ან ხელახლა გავრცელება, სრულად ან ნაწილობრივ, ნებისმიერი საშუალებით (მათ შორის, ქეშირება, შექმნა), გაყიდვა, გადაყიდვა, განმეორებითი გადაცემა ან მესამე მხარეებისთვის არ არის დაშვებული. იმ შემთხვევაში, თუკი შესაძლებელია მომსახურების ფარგლებში რაიმე მასალის გადმოწერა ან ბეჭდვა, მაშინ ასეთი მასალის გადმოწერა შესაძლებელია მხოლოდ ერთ აპარატზე (და შესაძლებელია წერილობით ფორმაში ბეჭდვა) და მხოლოდ თქვენი პერსონალური, არაკომერციული მიზნით გამოყენებისთვის.

პლატფორმის პასუხისმგებლობის შეზღუდვა

ექსტრა არ იძლევა გარანტიას, რომ პლატფორმა იქნება მუდმივად ხელმისაწვდომი ან/და ყოველთვის იმუშავებს შეფერხების გარეშე, თუმცა, პასუხს აგებს პლატფორმის გაუმართაობით გამოწვეული ზიანისათვის, რომლითაც დაირღვა „მომხმარებლის უფლებების შესახებ“ საქართველოს კანონითა და „ელექტრონული კომერციის შესახებ“ საქართველოს კანონით გათვალისწინებული მომხმარებლის უფლებები.

დავა/კანონმდებლობა

მომხმარებელსა და ექსტრა შორის ურთიერთობა რეგულირდება საქართველოს კანონმდებლობის შესაბამისად.

პრეტენზიის არსებობის შემთხვევაში მომხმარებელი უფლებამოსილია მიმართოს ექსტრას წერილობით შემდეგ მისამართზე info@extra.ge ან ქ. თბილისი, პეკინის გამზ. 41, მე-3 სართული. პრეტენზიის მიღებიდან არაუმეტეს 14 (თოთხმეტი) კალენდარული დღის ვადაში სს „ექსტრა არეა“ განიხილავს მას და დაუბრუნდება მომხმარებელს უკუკავშირით. 

ნებისმიერი დავა გადაწყდება მოლაპარაკების გზით. იმ შემთხვევაში თუ მოლაპარაკება იქნება წარუმატებელი, მომხმარებელი უფლებამოსილია მიმართოს სსიპ - საქართველოს კონკურენციის და მომხმარებლის დაცვის სააგენტოს (დავის შინაარსის გათვალისწინებით) ან პირდაპირ სასამართლოს.

ცვლილებები/დამატებები

წინამდებარე დოკუმენტი შესაძლოა შეიცვალოს ცალმხრივად, ექსტრას ინიციატივით ნებისმიერ დროს, რომლის შესახებაც ინფორმაცია დარეგისტრირებულ მომხმარებლებს უნდა ეცნობოთ გონივრული ვადით ადრე, პირად კაბინეტში სავალდებულოდ გასაცნობი შეტყობინების სახით, ელ ფოსტით ან სმს შეტყობინებით.