როგორ უნდა დაადგინო კანის ტიპი – რჩევები ნინიასგან

კანის ტიპის დადგენა თავის მოვლის რუტინის ეფექტურობის მთავარი განმსაზღვრელია. ზუსტად უნდა იცოდე როგორი კანი გაქვს – ნორმალური, მშრალი, ცხიმიანი, კომბინირებული თუ მგრძნობიარე? მხოლოდ ამის შემდეგ იპოვი ზუსტად შენზე მორგებულ კანის მოვლის საშუალებას.

ბლოგში ნინია მოგიყვება კანის ტიპების შესახებ და გირჩევს, როგორ შეარჩიო სწორად კანის მოვლის პროდუქტები.

უმეტესად, ჩვენი კანის ტიპს გენეტიკა განაპირობებს, თუმცა, გარემო სტრესის, დაბინძურების და ჰორმონალური ცვლილებების ზეგავლენის შედეგად, შესაძლოა კანის ტიპი შეიცვალოს.

რა თქმა უნდა, ჯობს, თუ კანის ტიპს დერმატოლოგთან დაადგენთ, რადგან მხოლოდ კანის ტიპი არ განაპირობებს ჩვენი კანის მდგომარეობას. გასწავლით მარტივ ხრიკს როგორ დაადგინოთ კანის ტიპი სახლის პირობებში.

მოიძიეთ ყველაზე ნაზი დასაბანი საშუალება, უმჯობესია, უსურნელო და გრილი წყლით დაიბანოთ კანი.  შეიმშრალეთ ნაზად, დამატებით, არ წაისვათ კანზე არაფერი და დაიწყეთ დაკვირვება. ნახევარი საათის შემდეგ, გამოიხატება სიმპტომები და ერთ-ორ საათში კანზე ცვლილებებსაც დაინახავთ.

ამ პროცესისთვის Bioderma Sensibio დასაბანი გელი შესანიშნავი არჩევანი იქნება, რადგან არ შეიცავს სურნელოვან დანამატებს. პროდუქტში გამოყენებულია ნაზი ამაქაფებელი ინგრედიენტები, რაც არ იწვევს კანის გაღიზიანებას.

დააკვირდით, ყველაზე დიდი კონცენტრაციით ცხიმის გამოყოფა ხდება სახესა და სკალპზე. სწორედ ეს ზონებია ყველაზე პრობლემური.

1. მშრალი კანი

თუ დაბანის შემდეგ თქვენი კანი ოდნავ იქერცლება, გრძნობთ დისკომფორტს, დაჭიმულობას, ხშირად უსწორმასწორო ტექსტურა გაწუხებთ, დიდი ალბათობით, მშრალი კანი გაქვთ. ასეთი ტიპის კანი განიცდის ცხიმისა და ლიპიდების ნაკლებობას, რის გამოც ტენიანობასაც მალე კარგავს. მშრალ კანზე ფორები ნაკლებად, ხოლო ნაოჭები მეტად ხილვადია. ლოყების ზონა შესაძლოა მეტად მგრძნობიარე იყოს და ხშირად, გაღიზიანება და სიწითლე სწორედ ლოყებზე გამოიხატება.

მშრალი კანის შემთხვევაში, სჯობს მსუყე, მცენარეული ცხიმებით გაჯერებული და კანის დამცავი ბარიერის აღმდგენი პროდუქტები გამოიყენოთ. მნიშვნელოვანია, სწორი დასაბანი საშუალების შერჩევა, რომ კანი არ გააღიზიანოთ.

2. ცხიმიანი კანი

თუ დაბანის შემდეგ კანზე სიპრიალე და ცხიმის გამოყოფა შეამჩნიეთ, დიდი ალბათობით, ცხიმიანი კანი გაქვთ.

ზედმეტი ცხიმის გამოყოფა კანს ხდის პრიალას, ხსნის ან ახშობს ფორებს, თუმცა, მშრალი კანისგან განსხვავებით, ცხიმიან კანზე ნაოჭები ნაკლებად ხილვადია.

ცხიმიანი კანის შემთხვევაში, გირჩევთ გამოიყენოთ მსუბუქი, წყლის ბაზაზე დამზადებული დასაბანი, გელის ტიპის დამატენიანებელი ან ლოსიონი. ასევე, ეფექტურია ცხიმის მარეგულირებელი საშუალებების გამოყენება.

3. კომბინირებული კანი

თუ დაბანის შემდეგ თქვენს სახეზე რომელიმე ზონა მეტად გაცხიმიანდა, ზოგ ადგილას კი დაჭიმულობის ან დისკომფორტის შეგრძნება გაქვთ, დიდი ალბათობით, კომბინირებული კანი გაქვთ.

კომბინირებული კანის შემთხვევაში, როგორც წესი, T  ზონა განსაკუთრებით ცხიმიანია, რადგან ცხვირზე ყველაზე მეტი ცხიმოვანი ჯირკვალია განლაგებული. შესაძლოა, ჰორმონალური აკნეს გამო U ზონა გქონდეთ ცხიმიანი, ან O ზონა – ცხიმიანი და დანარჩენი ზონები – ნორმალური ან მშრალი.

როგორც ხედავთ, კომბინირებული კანი სრულად ამართლებს თავის სახელს. ასეთი კანის შემთხვევაში შეგიძლიათ ზონების მიხედვით გამოიყენოთ სხვადასხვა პროდუქტი, ან შეჯერდეთ საშუალო კონსისტენციის პროდუქტზე.

4. ნორმალური კანი

კანის ტიპებს შორის ნორმალური კანი ყველაზე კომფორტულია. დაბანის შემდეგ, არც ფორებია ზედმეტად გამოხატული და არც დაჭიმულობის ან აქერცვლის დისკომფორტი შეგაწუხებთ. შეგიძლიათ ექსპერიმენტების ჩატარება და სხვადასხვა ტექსტურის მქონე პროდუქტების გამოცდა.

5. მგრძნობიარე კანი

მგრძნობიარე კანის მქონე ადამიანებისთვის გარემო განსაკუთრებულ სტრესს ქმნის. მხოლოდ დაბანაც კი ხშირად წვისა და წიწკვნის შეგრძნებას, დისკომფორტს ან ძლიერ სიწითლეს იწვევს.

რა შემთხვევაში უნდა ჩაითვალოს კანის ტიპი მგრძნობიარედ

ამის შესახებ არსებობს განსხვავებული მოსაზრებები, რადგან შესაძლოა მგრძნობიარე იყოს როგორც ცხიმიანი, ასევე მშრალი კანიც. თუ კანის მგრძნობელობა დროებითია, სეზონურია ან მედიკამენტის/პროდუქტის გამოყენების შემდგომ იჩენს თავს ასეთი კანი არ უნდა განვიხილოთ მგრძნობიარედ.

მგრძნობიარე კანი ზედმეტად რეაქტიულია. ასეთი ტიპის კანი ადამიანებს ბავშვობიდან აქვთ. გარემო ფაქტორები, პროდუქტები, რასაც დაიტანთ კანზე შესაძლოა გაღიზიანების ხელშემწყობი გახდეს, ამიტომ, უნდა შევარჩიოთ უსურნელო, უალკოჰოლო და მინიმალური ინგრედიენტების შემცველი პროდუქტები.

კანის მოვლისას გაითვალისწინე

• თუ კანის პრობლემა გაწუხებთ, უმჯობესია დაიწყოთ დღიურის წარმოება, რაც დაგეხმარებათ კანის მოვლის პროდუქტების მიზანმიმართულად შერჩევაში.
• არ არის საჭირო ბევრი პროდუქტის გამოყენება, ხშირად ნაკლები უკეთესია.

გარდა ზემოთ ჩამოთვლილი კანის ტიპებისა, ჩვენი კანი შესაძლოა იყოს რეზისტენტული, მოშვებული ან მკვრივი, პიგმენტით მდიდარი ან ღია ფერის. თუმცა, ეს უკვე მომავალი ბლოგის თემაა. ამიტომ, თვალი გვადევნე, არ გამოგრჩეს სიახლეები.