თუ შენი ჭურჭლის სარეცხი მანქანის მარილის ინდიკატორი ანათებს, ეს ნიშნავს, რომ მარილის დამატების დროა.
მაგრამ როგორ უნდა გააკეთო ეს სწორად, რომ მანქანამ უკეთ იმუშაოს და ჭურჭელიც იდეალურად გარეცხოს? ამ ყველაფერს ბლოგიდან შეიტყობ.
რატომ არის საჭირო მარილი ჭურჭლის სარეცხი მანქანისთვის
ჭურჭლის სარეცხ მანქანას სპეციალური მარილი სჭირდება იმისთვის, რომ წყალი დარბილდეს.
ხისტი წყალი ხელს უწყობს ქვის ნადების დაგროვებას, რაც დროთა განმავლობაში აზიანებს მანქანასაც და ჭურჭლის გაწმენდასაც აფერხებს.
როგორ ჩავყაროთ მარილი ჭურჭლის სარეცხ მანქანაში
პირველ რიგში, მოძებნე მარილის რეზერვუარი. ის, როგორც წესი, მანქანის ქვედა ნაწილშია, ქვედა კალათის ქვეშ.
- ამოიღე კალათი და დაინახავ მრგვალ სახურავს
- გახსენი სახურავი. ის საათის ისრის საწინააღმდეგოდ უნდა დაატრიალო, რომ გაიხსნას
- თუ მარილს პირველად უმატებ, სასურველია, რომ რეზერვუარში ჯერ ცოტაოდენი წყალი ჩაასხა, შემდეგ კი დაუმატე მარილი
- გამოიყენე სპეციალური რეგენერაციული მარილი (არა სამზარეულოს მარილი, რადგან მასში დამატებითი მინარევებია)
- მარილი ჩაყარე პირდაპირ რეზერვუარში, რომელშიც, დაახლოებით, 1 კგ ჩაეტევა
- დახურე სახურავი ისე, რომ კარგად მოეჭიროს და წყალი გარეთ არ გამოვიდეს
მარილის დამატების შემდეგ, უმჯობესია, ცარიელი მანქანა ჩართო დაბალ ციკლზე, რომ მარილი სწორად გაიხსნას და სისტემა გაიწმინდოს.
რამდენჯერ უნდა ჩავყაროთ მარილი
ის თუ რამდენჯერ უნდა ჩაყარო მარილი ჭურჭლის სარეცხ მანქანაში, დამოკიდებულია წყლის სიხისტესა და მანქანის მოდელზე. ზოგადად:
- თუ წყალი ძალიან ხისტია, შესაძლებელია, ყოველ თვეში ერთხელ დაგჭირდეს მარილის დამატება.
- ზოგ მანქანას ინდიკატორი აქვს, რომელიც შეგატყობინებს, როდისაა საჭირო მარილის ჩამატება.
- მარილის ჩამატებისას მანქანა გამორთული უნდა იყოს.
- თუ მარილის რეზერვუარიდან წყალი გადმოდის, ნუ ინერვიულებ – ეს ნორმალურია.
- შესაძლოა შენს ჭურჭლის სარეცხ მანქანას რაიმე სპეციფიკური მოთხოვნები ჰქონდეს, ამიტომ, ყურადღებით გაეცანი მის თანმდევ ინსტრუქციასაც.
როგორც ხედავ, ჭურჭლის სარეცხ მანქანაში მარილის დამატება ძალიან მარტივია, ამ პროცესის სწორად წარმართვა დაგეხმარება, რომ მანქანამ დიდხანს და ეფექტურად იმუშაოს, ხოლო ჭურჭელი იდეალურად ბრწყინავდეს.
