სახის შრატი კანის მოვლის რუტინაში ერთ-ერთი უმნიშვნელოვანესია. დღევანდელ ბლოგში ნინია, რომელიც La Roche Posay-ის აქტიური მომხმარებელია, შრატებისა და მათი გამოყენების წესების შესახებ მოგიყვება.
ეფექტური ფორმულების და აქტიური ინგრედიენტების იდეალური თანაფარდობის წყალობით La Roche Posay დერმატოლოგების ერთ-ერთი საყვარელი და რეკომენდებული ბრენდია.
მოდი, ყველასთან თავსებადი და ყველასთვის საყვარელი ჰიალურონის მჟავით დავიწყოთ.
რა არის ჰიალურონის მჟავა? ის ერთ-ერთი მთავარი მოლეკულაა კანის ტენიანობის შესანარჩუნებლად. ჰიალურონი ადამიანის ორგანიზმში უკვე არსებობს და მისი 50% მეტი კანში გვხვდება. ჩვენი ორგანიზმი მუდმივად გამოიმუშავებს ჰიალურონს, რადგან ის ძალიან სწრაფად დეგრადირდება.
ჰიალურონის მჟავა გვეხმარება წყლის ბალანსში, ატენიანებს კანის ზედაპირს და ეხმარება ჭრილობების სწრაფად მოშუშებას. დატენიანებული კანი კი ნაკლებად ხილვად ნაოჭებს ნიშნავს.
გარდა ჰიალურონისა, შრატი შეიცავს პანთენოლსაც (vitamin B5). კანის ბარიერის აღსადგენად და დასაცავად რა შეიძლება იყოს ამაზე უკეთესი დუო? პროდუქტში შემავალი გლიცერინის და სილიკონის ფორმულა იდეალურია ყველა ტიპის კანისთვის.
ჰიალურონის მჟავა კარგად ეწყობა სხვა აქტიურ ინგრედიენტებს. თავისუფლად შეგიძლიათ გამოიყენოთ დილის და ღამის რუტინაში, რეტინოლთან, C ვიტამინთან, ნიაცინამიდთან და სხვა აქტიურ ნივთიერებებთან ერთად.
მითია, რომ ჰიალურონმა კანის გაუწყლოება შეიძლება გამოიწვიოს. ეს მოსაზრება დამკვიდრებულია არასწორი შეფასებებით.
ჩემი დილის რუტინის განუყოფელი ნაწილია ასკორბინის მჟავა (C ვიტამინი). სიტყვა მჟავა ნუ შეგაშინებთ. მოსაზრება, რომ C ვიტამინი ფოტო-სენსიტიურია სიმართლეს არ შეესაბამება, შესაბამისად, თავისუფლად გამოიყენებთ მთელი წელი, SPF-თან ერთად.
C ვიტამინი მონაწილეობას იღებს კოლაგენის ფორმირებაში, ხელს უშლის კოლაგენის დაშლას, მუქი პიგმენტის წარმოქმნას, შესაბამისად, ებრძვის მელაზმას, პოსტ-აკნე ლაქებს და ჰიპერპიგმენტაციას. ერთ-ერთი ყველაზე დიდი ბენეფიტი მისი ანტიოქსიდანტური მოქმედებაა – ხელს უშლის მზისგან მიღებულ დაზიანებას და ებრძვის თავისუფალ რადიკალებს.
C ვიტამინის შერჩევისას ძალიან მნიშვნელოვანია მისი ფორმულა და ბრენდის სანდოობა. ამიტომ, La Roche Posay ძალიან კარგი არჩევანია. პროდუქტი შეიცავს 10% ასკორბინის მჟავას, C ვიტამინის სუფთა და ყველაზე კარგად შესწავლილ ფორმულას. აგრეთვე, სალიცილის მჟავას, რაც ხელს უწყობს კანის ექსფოლიაციას (აქერცვლას), შავ წერტილებთან ბრძოლას, ფორების სისუფთავის შენარჩუნებას და C ვიტამინის კანში შეღწევადობას. Neurosensine ძალიან ეფექტური პეპტიდია – ეხმარება ბარიერის აღდგენაში და ამშვიდებს კანს.
პროდუქტი იდეალური დამატენიანებელია, შეიცავს გლიცერინს, ჰიალურონის მჟავას და E ვიტამინს. ვიტამინი E, კვლევების მიხედვით, აორმაგებს C ვიტამინის ეფექტს.
შრატი შეგიძლიათ გამოიყენოთ დილას და საღამოს, თუმცა, ყველაზე ეფექტურია დილის რუტინაში, სუფთა კანზე წასმა.
გამოცდილ მომხმარებლებს დამატებით ვურჩევდი დილის რუტინაში C ვიტამინის, ხოლო ღამის რუტინაში A ვიტამინის გამოყენება.
თუ რუტინაში რეტინოლის ჩართვა გსურთ და გეშინიათ რომ შრატი შეიძლება ძალიან ძლიერი აღმოჩნდეს თქვენი კანისთვის ან მგრძნობიარე კანი გაქვთ, მაშინ ეს პროდუქტი თქვენთვის არის.
რეტინოიდები A ვიტამინის წარმონაქმნების კრებითი ტერმინია. აჩქარებს კანის მეტაბოლიზმს, ებრძვის ნაოჭებს, ფორების ხილვადობას, აკნეს, პიგმენტურ და პოსტ-აკნე ლაქებს. ასევე, ხელს უწყობს კოლაგენის სინთეზს, არის ანტიოქსიდანტი ებრძვის მზით გამოწვეულ კანის დაზიანებას, ეხმარება მზისგან დაზიანებული უჯრედების რეგენერაციასაც კი. სწორედ ამ დიდი ოჯახის წარმომადგენელია რეტინოლი. თუ თქვენ A ვიტამინი ჯერ არ ჩაგირთავთ რუტინაში, ეს შრატი იდეალური იქნება დასაწყებად.
გარდა რეტინოლისა და ნიაცინამიდისა, ფორმულა შეიცავს დამატენიანებელ და კანის აღმდგენ ინგრედიენტებსაც, რაც ამცირებს გაღიზიანებას და შესაძლებელს ხდის გამოყენებას მგრძნობიარე კანზეც.
რეტინოლის გამოყენება რეკომენდებულია ღამის რუტინაში – 3-4 წვეთი უნდა გაინაწილოთ მშრალ კანზე და მოარიდოთ თვალის და ტუჩის გარშემო კანს.
დაწყებისას, შეგიძლიათ სენდვიჩის მეთოდი გამოიყენოთ, (დატენიანება/რეტინოლი/დატენიანება). როდესაც კარგად გაიცნობთ პროდუქტს შეგიძლიათ უკვე სუფთა კანზე დაიტანოთ ის.
დილას, აუცილებლად, გამოიყენეთ მზისგან დამცავი საშუალება, კანის ტიპის მიხედვით.
მათ ვისაც აქვს ცხიმიანი ან აკნესკენ მიდრეკილი კანი La Roche-Posay ძალიან ეფექტურ სალიცილის და გლიკოლის მჟავის შემცველ ამქერცლავ შრატს სთავაზობს.
გლიკოლის მჟავა ალფა ჰიდროქსი მჟავებს შორის ყველაზე პატარა მოლეკულური ზომისაა, ღრმად აღწევს კანში და აშორებს მკვდარ უჯრედებს, ებრძვის პიგმენტურ ლაქებს და ზედაპირული ნაოჭების ხილვადობას. კვლევების მიხედვით, გლიკოლის მჟავა კოლაგენის წარმოქმნის დამხმარეც არის.
ფორმულაში შემავალი სალიცილის მჟავა არის ცხიმში ხსნადი და ასევე, ღრმა შეღწევადობა აქვს კანში, ებრძვის ღია და დახურულ კომედონებს, არის ანთების საწინააღმდეგო მოქმედების და ფორების ხილვადობის შემცირებასაც უწყობს ხელს.
გარდა ამქერცლავებისა, შრატი შეიცავს ნიაცინამიდსაც, რომელიც აუმჯობესებს კანის ფერს და ეხმარება ბარიერის აღდგენას. შრატი შესანიშნავად აბალანსებს ცხიმის გამოყოფას. ვფიქრობ, იდეალური დანამატია აკნესკენ მიდრეკილი კანის რუტინაში.
უმჯობესია, თუ დაიტანთ სუფთა, მშრალ კანზე. პროდუქტის გამოყენება შეგიძლიათ როგორც დღის ასევე ღამის რუტინაში. არ დაგავიწყდეთ მზისგან დაცვა.
იმედია, დაგეხმარებათ ჩემი რჩევები და სასურველ შრატსაც სულ მალე შეარჩევთ.
