ნივთი, რომელიც ყველა ოჯახს აუცილებლად სჭირდება და სამზარეულოს ყველაზე მთავარ ატრიბუტს წარმოადგენს მაცივარია. ამიტომ, თუ ყიდვას აპირებ, აჯობებს, წინასწარ ზუსტად იცოდე რა აუცილებელ ტექნიკურ მახასიათებლებს მიაქციო ყურადღება იმისთვის, რომ შემდგომში იმედები არ გაგიცრუვდეს.

1. კამერების რაოდენობა

არსებობს ერთკამერიანი, ორკამერიანი და ე.წ Side-By-Side, ანუ 3-5 კამერიანი მაცივრები. ყველაზე დაბალ ფასად ერთკამერიან მაცივარს იპოვი, ყველაზე ძვირადღირებული კი დიდი მოცულობის, Side-By-Side მოდელებია.

2. ინსტალაციის ტიპი და ზომა

მას შემდეგ, რაც გადაწყვეტ ჩასაშენებელი მაცივარი გჭირდება თუ ცალკე მდგომი, გადახედე სივრცეს სამზარეულოში და არ დაგავიწყდეს სწორად გაზომვა – მაცივარი  კედლიდან და გვერდებიდან 5 სანტიმეტრით უნდა იყოს დაშორებული.

3. ის რაც გემოვნების საკითხია

ფერი – მხოლოდ შენ იცი რა ფერის მაცივარი დაამშვენებს შენი სამზარეულოს ინტერიერს.

დიზაინი – მაცივრის ვიზუალი პირველ რიგში შენი გემოვნების გამოხატულებაა. მაგრამ გაითვალისწინე, რომ ქვედა საყინულიანი მაცივარი განსაკუთრებულად კომფორტულია და უფრო ტევადიც.

მოცულობა – პირდაპირ კავშირშია ოჯახის წევრების რაოდენობასთან და იმასთანაც, თუ რა რაოდენობის პროდუქტს ყიდულობთ მაცივარში შესანახად.

4. გალღობის სისტემა – NoFrost VS Defrost

• მაცივარი NoFrost ანუ მშრალი გალღობის სისტემით არ საჭიროებს მოვლისას ძალისხმევას, რადგან, უშუალოდ, მაცივარში არ წარმოიქმნება ყინული.  ყინულის წარმოქმნა ხდება მაცივრის კედლის შიგნით, რამდენიმე საათში ერთხელ, ყინული ლღვება ავტომატურად და წარმოქმნილი კონდენსატი ორთქლდება.

• Defrost ანუ ნახევრად მშრალი გალღობის მაცივარში წარმოიქმნება ყინულები, რის გამოც რამდენიმე თვეში ერთხელ აუცილებელია მაცივრის გამორთვა, გალღობა და წმენდა. ნახევრად მშრალ მაცივარს აქვს მაღალი ტენიანობა, არ ხდება ჰაერის გამოშრობა, რის გამოც, პროდუქტები ინარჩუნებს ფორმას, ვიტამინებს, ჯანსაღ იერს და არ საჭიროებს სპეციალურ შეფუთვას.

• Nofrost სისტემის მაცივრების კამერაში ტემპერატურის გადანაწილება ხდება თანაბრად და ხმაურის დონეც მაღალია რადგან კომპრესორის და ვენტილატორის მუშაობა ხდება ერთდროულად. Defrost სისტემა ნაკლებ ელექტროენერგიას მოიხმარს და ხმაურის დონეც დაბალი აქვს. აღსანიშნავია ისიც, რომ ნახევრად მშრალი მაცივრები გაცილებით ტევადია.

დღეს ბაზარზე, ასევე, ვხვდებით მაცივრებს კომბინირებული გალღობის სისტემით, ამ შემთხვევაში, მაცივრის კამერა არის ნახევრად მშრალი, საყინულე კამერა – მშრალი.

5. ფუნქციები რაც სასურველია შენს მაცივარს ჰქონდეს

• ანტიბაქტერიული საფარი
• ჰაერის ფილტრი
• ფრეშ ზონა
• კარის ბლოკირება
• ღია კარის სიგნალი
• წყლის დისპენსერი

6. ენერგოეფექტურობის კლასი

მაცივრის ენერგოეფექტურობის შესახებ ლათინური ანბანის ასოები და + ნიშნები გაწვდის ინფორმაციას. ენერგომოხმარების უმაღლეს კლასად აღიარებულია A, მის გასწვრივ + ნიშანი კი გამცნობთ, რომ მაცივარი 10%-ით ნაკლებ ელექტროენერგიას მოიხმარს. ყოველ დამატებით + ნიშანში დამატებით 10% ენერგოეფექტურობა ივარაუდება.

7. კომპრესორი და ფრეონი

თანამედროვე მაცივრების უმეტესობას აქვს ერთი ინვერტორული კომპრესორი. ხარისხიანი კომპრესორი განსაზღვრავს მაცივრის დაბალი ხმაურის დონეს და ეკონომიურობას. მნიშვნელოვანია მაცივებელი სისტემაც, ანუ ფრეონი. ყველაზე ეკონომიური და გარემოსადმი უსაფრთხოა ფრეონი R600a.

ბლოგის საშუალებით, ვცადეთ, რჩევის მოგვეწოდებინა ის საკვანძო საკითხები რაც დაგეხმარება შენს გემოვნებასა და ცხოვრების რიტმზე მორგებული ოპტიმალური ვარიანტის შერჩევაში. დაათვალიერე ყველა მაცივარი extra.ge-ზე, სადაც მარტივად იპოვი სასურველ მოდელს ნებისმიერი საფასო კატეგორიიდან.