გაზქურის გაწმენდა ხშირად ყველაზე დამღლელი საოჯახო საქმეა, განსაკუთრებით მაშინ, როცა საქმე ჩამჯდარ ცხიმსა და მიმწვარ ლაქებს ეხება. თუმცა, თუ სწორ მეთოდებსა და საშუალებებს გამოიყენებ, ეს პროცესი სულ რამდენიმე წუთს წაგართმევს, თანაც ისე, რომ ზედაპირი არ დაკაწრო და პირვანდელი ბზინვარება დაუბრუნო.
ამ ბლოგში გაეცნობი ეტაპობრივ ინსტრუქციას, ბუნებრივ და პროფესიონალურ ხრიკებს და დეტალებს, რომლებიც გაზქურის მოვლას გაგიმარტივებს.
რა გჭირდება გაზქურის ეფექტური წმენდისთვის?
სანამ საქმეს შეუდგები, მოიმარაგე საჭირო ინვენტარი, რათა პროცესში არ შეფერხდე:
- მიკროფიბრის რბილი ტილოები და ღრუბელი (უხეში მეტალის მავთულის გარეშე)
- საჭმელი სოდა და თეთრი ძმარი – იდეალურია ბუნებრივი წმენდისთვის
- ჭურჭლის სარეცხი სითხე ცხიმის პირველადი დარბილებისთვის
- ცხიმის დამშლელი პროფესიონალური სპრეი რთული, ძველი ლაქებისთვის
- კბილის ჯაგრისი ვიწრო ადგილებისთვის
- რეზინის ხელთათმანები ხელების დასაცავად
გაზქურის გაწმენდის ეტაპობრივი ინსტრუქცია
სრული და უსაფრთხო სისუფთავისთვის მიჰყევი ამ ნაბიჯებს:
1. უსაფრთხოება და დეტალების მოხსნა
დარწმუნდი, რომ ზედაპირი სრულიად ცივია. მოხსენი თუჯის ან ემალირებული გისოსები, სანთურები (კომფორები) და მათი თავსახურები.
2. გისოსებისა და სანთურების დალბობა
ჩაალბე მოხსნილი დეტალები თბილ წყალში, რომელშიც წინასწარ გახსნი ჭურჭლის ჟელესა და ცოტაოდენ სოდას. გააჩერე 20–30 წუთი, რათა მიმწვარი ცხიმი თავისით დარბილდეს და გახეხვა აღარ დაგჭირდეს.
3. ზედაპირის დამუშავება სოდითა და ძმრით
მოაყარე გაზქურის ზედაპირს საჭმელი სოდა, ზემოდან შეასხი თეთრი ძმარი და დაელოდე აქაფებას 15 წუთის განმავლობაში. ეს ბუნებრივი ქიმიური რეაქცია იდეალურად შლის ჩამჯდარ ჭუჭყსა და ცხიმს.
4. გაწმენდა და გაპრიალება
რბილი ღრუბლით, წრიული მოძრაობით მოაშორე დარბილებული მასა. მოერიდე უხეშ სახეხებს, რათა ემალი ან უჟანგავი ფოლადი არ დაკაწრო.
5. გაშრობა და აწყობა
საფუძვლიანად გაამშრალე ზედაპირი და მოხსნილი დეტალები მშრალი მიკროფიბრის ტილოთი და დააბრუნე თავის ადგილზე.
როგორ გავწმინდოთ მინისა და უჟანგავი ფოლადის (Inox) ზედაპირი
- მინისა და კერამიკის ზედაპირი: მოითხოვს განსაკუთრებულ სიფრთხილეს. გამოიყენე მხოლოდ სპეციალური მინის საწმენდი საშუალებები ან ძმრისა და წყლის ნაზავი (1:1 პროპორციით). მიმწვარი ლაქებისთვის გამოიყენე მხოლოდ სპეციალური მინის საფხეკი.
- უჟანგავი ფოლადი (Inox): გაწმენდისას ყოველთვის გაუსვი ტილო ლითონის ტექსტურის (ხაზების) მიმართულებით და არა წრიულად – ასე თავიდან აირიდებ მქრქალ ლაქებსა და ზოლებს.
გაზქურის წმენდისას ხშირად ვაწყდებით პრობლემებს, რომლებსაც სტანდარტული ტილო ვერ აგვარებს. როგორ უნდა მოიქცე ასეთ დროს?
როგორ გავწმინდო გაზქურის ჩამრთველი სახელურები?
სახელურების გარშემო და ქვეშ ცხიმი და მტვერი ყველაზე მარტივად გროვდება. თუ სახელურები იხსნება, მოხსენი და 10 წუთით ჩაალბე თბილ ძმრიან წყალში. ვიწრო ღარებისა და კუთხეების გამოსასუფთავებლად კი გამოიყენე ძველი კბილის ჯაგრისი – ის ზედაპირს არ დაკაწრავს და ჭუჭყს იდეალურად ამოიღებს.
რა ვქნა, თუ კომფორი ჭავლი გაიჭედა და ალი სუსტად ან უთანაბროდ ანთია?
საჭმლის გადმოსვლისას გაზის პატარა გამოსასვლელი ნახვრეტი ხშირად იჭედება. არასდროს გამოიყენო ხის კბილის ჩხირი, რადგან ის შეიძლება შიგნით გადატყდეს.
გამოიყენე გაშლილი ლითონის სკრეპი, წვრილი ნემსი ან მავთული, ფრთხილად ამოასუფთავე ჭავლი და შემდეგ მტვერსასრუტით ან მშრალი ტილოთი მოაშორე ნარჩენები.
შეიძლება თუ არა თუჯის გისოსების ჭურჭლის სარეცხ მანქანაში გარეცხვა?
კატეგორიულად არა. ცხელი წყლისა და აგრესიული ტაბლეტების ხანგრძლივი ზემოქმედებით თუჯი კარგავს ბუნებრივ დამცავ ფენას, უფერულდება და ძალიან მალე იწყებს დაჟანგვას. თუჯის გისოსები ყოველთვის ხელით, თბილი წყლითა და რბილი ღრუბლით გარეცხე.
როგორ მოვაშორო დამწვარი შაქარი ან რძე მინის ზედაპირს?
დამწვარი შაქარი მინისთვის ყველაზე საშიშია თუ ის ბოლომდე გაცივდა. მოშორებისას შესაძლოა მინის მიკრონაწილაკებიც ააყოლოს. ამიტომ:
- გამორთე გაზქურა, დაელოდე მის ოდნავ შეგრილებას (ისე, რომ ხელი არ დაგეწვას) და სპეციალური სილიკონის ან მინის საფხეკით, 30-გრადუსიანი კუთხით ფრთხილად ააცალე ლაქა.
სად ვიყიდო ხარისხიანი გაზქურა
სწორი მოვლა ტექნიკის სიცოცხლეს ახანგრძლივებს, თუმცა, თუ შენი გაზქურა უკვე ძველია, ლაქები ლითონის სტრუქტურაშია გამჯდარი ან უბრალოდ დროა სამზარეულო უფრო თანამედროვე, ენერგოეფექტური ტექნიკით აღჭურვო, დაათვალიერე ექსტრა მარკეტფლეისზე. იქამდე კი გაეცანი ჩვენს წინა ბლოგს და გაიგე როგორ უნდა შეარჩიო გაზქურა სამზარეულოსთვის.
ექსტრაზე დაგხვდება გაზქურების, ჩასაშენებელი ზედაპირებისა და ღუმელების დიდი არჩევანი.
გაითვალისწინე ბლოგში გაზიარებული რჩევები, ასევე, თვალი გადაავლე ჩვენს წინა ბლოგს თუ როგორ მოვუაროთ გაზქურას სწორად და დაინახავ, რომ გაზქურის გენერალური წმენდა თვეში მხოლოდ ერთხელ დაგჭირდება.
