თუ გინდა, რომ სახლის პირობებში თმა სწრაფად და მარტივად დაიხვიო, თმის უთო იდეალური გამოსავალია.
ბევრს ჰგონია, რომ უთო მხოლოდ თმის გასასწორებლად გამოდგება, მაგრამ სინამდვილეში, სწორად გამოყენების შემთხვევაში, მისი საშუალებით, საოცრად ლამაზი ტალღები და კულულები შეგიძლია შექმნა.
ბლოგში გაგიზიარებ რჩევებს თუ როგორ დაიხვიო თმა უთოთი ისე, რომ შედეგი იყოს ხანგრძლივი და ბუნებრივი.
ნაბიჯი 1. მოამზადე თმა დახვევისთვის
დახვევის წინ თმის მომზადება აუცილებელია, რადგან ასე არ დააზიანებ მას და კულულებიც უფრო დიდხანს შეგინარჩუნდება.
- დაიბანე თმა და კარგად გააშრე
- დაიტანე თერმოდამცავი საშუალება – თმის ზეთი ან სპრეი, რადგან უთოს მაღალი ტემპერატურა თმას აშრობს და აზიანებს
- კარგად დაივარცხნე თმა
ნაბიჯი 2. ჩართე უთო და დააყენე ტემპერატურა
გაითვალისწინე, რომ ყველა უთო არ გამოდგება თმის დახვევისთვის. იდეალურია უთო, რომელსაც მომრგვალებული პირები აქვს, რადგან ასე კულულები უფრო რბილი და ბუნებრივი გამოვა.
- 180-250°C ტემპერატურის დიაპაზონი შესაბამისია სქელი და უხეში თმისთვის
- 150-180°C – თხელი და დაზიანებული თმისთვის
გაითვალისწინე, თუ ძალიან მაღალი ტემპერატურით დაიხვევ თმას, კულულები უფრო დიდხანს გაგიძლებს, მაგრამ, ხშირად გამოყენებისას, თმას დააზიანებს.
ნაბიჯი 3. თმის დახვევის ტექნიკა
- კლასიკური კულულებისთვის, აიღე თმის პატარა ნაწილი (დაახლოებით 2-3 სმ სიგანის)
- უთო მოათავსე ძირიდან რამდენიმე სანტიმეტრით მოშორებით
- დაახვიე თმა უთოს გარშემო, ისე, როგორც სახვევზე
- გააჩერე 5-7 წამი და შემდეგ თმა ფრთხილად დაუშვი
- ეს პროცესი გაიმეორე მთელ თავზე
ამ მეთოდით, გექნება გამოკვეთილი კულულები, რომლებიც უფრო დიდხანს შენარჩუნდება.
- ბუნებრივი ტალღებისთვის, თმის პატარა ნაწილი უთოში მოიქციე
- უთო შეაბრუნე 180°-ით და ნელა ჩამოიტანე ძირში
ეს გაიმეორე მთელ თავზე. შედეგად, გექნება ნაზი, ბუნებრივი ტალღები, სალონური ეფექტით.
ნაბიჯი 4: ხვეულების დაფიქსირება
თმის დახვევის შემდეგ კულულებს ხელით ნუ შეეხები რამდენიმე წუთი. როცა თმა გაცივდება, უფრო გამძლე იქნება.
- თუ გინდა, რომ კულულებმა მთელი დღე გაგიძლოს, მსუბუქი თმის ლაქი ან სპრეი გამოიყენე.
- თმის დახვევა-გასწორება რეკომენდებულია კვირაში, მაქსიმუმ, 2-3-ჯერ და თან ყოველთვის თერმოდამცავის გამოყენებით.
სცადე სხვადასხვა მეთოდი და ნახე, რომელი მოგიხდება ყველაზე მეტად. მთავარია, თმა დაიცვა დაზიანებისგან და საბოლოო შედეგიც ბუნებრივად გამოიყურებოდეს.
თუ შენს მეგობრებსაც აინტერესებს ეს თემა, გაუზიარე ბლოგი.
