მებო ნუცუბიძის გზაში საკითხავი წიგნები

„წიგნების ძალიან დიდი ნაწილი მგზავრობისას მაქვს წაკითხული. სტაჟირებაზე შეკოწიწებული ფულით სტუდენტობისას ქინდლი ვიყიდე. ის დღე იყო და განსაკუთრებით ტკბილი გახდა  59 ნომერი ავტობუსით უნივერსიტეტისკენ მიმავალი გზა. სპეციალურად, ბოლო გაჩერებაზე მივდიოდი, მძღოლის გვერდით ფანჯარასთან ვჯდებოდი და მთელი მგზავრობა მშვიდად ვმოგზაურობდი სხვა სამყაროებში. 

ალბათ, ზუსტად იმავე მიზეზით დღემდე განსაკუთრებულად მიყვარს მატარებლით მგზავრობა: ვიცი რომ გზაში, მატარებლის მონოტონური გუგუნისა და ლამაზი პეიზაჟების ფონზე, აუცილებლად წავიკითხავ ახალ წიგნს.

 თან, გზაში კითხვას მართლა სულ სხვა მუღამი აქვს, სულ სხვა ემოციები მოაქვს.

 ახლა რომ სადმე მივდიოდე, აუცილებლად დავავლებდი ხელს რამდენიმე წიგნს და მერე ტრანსპორტისა და განწყობის მიხედვით მივიღებდი საბოლოო გადაწყვეტილებას.

 სამ მათგანს თქვენც დიდი სიამოვნებით გაგიზიარებთ:

 ნილ გეიმანი – არსადროს

„ნილ გეიმანი „ამერიკელი ღმერთებით“ გავიცანი და პირველი გვერდებიდანვე შევიყვარე. თუმცა, „არსადროს“ კიდევ უფრო ზღაპრული, ჯადოსნური და თვალწარმტაცი მოგზაურობა აღმოჩნდა, რომელმაც საბოლოოდ განამტკიცა ჩემი სიყვარული გეიმანის შემოქმედებისადმი. აი, დაიწყეთ და თქვენ თვითონვე ნახავთ, რომ არაფერს ვაზვიადებ: ერთს გადაშლით და ვეღარ მოწყდებით.

ისე, თქვენი არ ვიცი და მე სულ თბილისზე ვფიქრობდი წიგნის კითხვისას. ნეტავ, მიწისქვეშა და ყველასთვის უხილავი თბილისი როგორია?“

 გიორგი კვიტატიანი – ბრინჯაოს ქალაქი

ქართველი ფენტეზი ავტორებით განებივრებული ნამდვილად არ ვართ. შესაბამისად, ახალგაზრდა ქართველი ავტორის (ვიცი, რომ საშინლად არ უყვარს, როცა მწერალს ვეძახი) – გიორგი კვიტატიანის გამოჩენა ქართულ ლიტერატურაში ძალიან მნიშვნელოვანი ამბავია და არაფრის დიდებით არ უნდა გამოაკლდეთ იმ ზღაპრულ თავგადასავალს, რომელიც მისი პირველი წიგნით დაიწყო.

„ბრინჯაოს ქალაქი“ ზუსტად ის წიგნია, რომელიც მგზავრობისას აბსოლუტურად განსხვავებულ, ახალსა და დაუვიწყარ სამყაროში გადაგიყვანთ. მერწმუნეთ, ვერც კი მიხვდებით ისე ჩახვალთ დანიშნულების ადგილამდე.“

 ბრენდონ სანდერსენი – ნისლქმნილი

„მოდი ისევ ფენტეზი ჟანრში დავრჩეთ და ნისლიან ლუთადელში ვიმოგზაუროთ. ვინ არიან კელსერი და ვინი? ვინ არის იმპერატორი? რატომ ცვივა ციდან ფერფლი და რა ბედი ეწევათ ადამიანებს, რომლებიც გამეფებული წესრიგის წინააღმდეგ იბრძვიან? წინასწარ გაფრთხილებთ, ბრენდონ სანდერსონის ჯადოსნურ სამყაროში მოგზაურობა ჩამთრევი და მისტიკურია.

მშვიდობიან მგზავრობას და რაც მთავარია – სასიამოვნო კითხვის პროცესს გისურვებთ!“