დღეს ადამიანების აზრი ტელევიზორის შესახებ იყოფა, ცალკეული კატეგორიისთვის ის ყოველდღიურობის განუყრელი ატრიბუტია და ინფორმაციის მიღების მთავარ წყაროს წარმოადგენს, ნაწილს არ უყვარს, ნაწილი იყენებს გართობისთვის, უსმენს მუსიკას, უყურებს ფილმებს ან თამაშობს.

არსებობს საყოველთაოდ გავრცელებული მოსაზრება, რომ კარგი ტელევიზორი უნდა იყოს დიდი, უკეთესია რკალისებრი ფორმის, სმარტ ფუნქციით აღჭურვილი, 4k.

ხშირად, ადამიანები ყიდვის გადაწყვეტილებას სწორედ ამ ინფორმაციის საფუძველზე იღებენ, იხდიან კოლოსალური რაოდენობის თანხას მაგრამ რეალურად, ფუნქციების დიდი ნაწილი არ სჭირდებათ.

ბლოგში მოგაწვდით რჩევებს, რომლის საფუძველზეც მიხვდები ზუსტად რა ფუნქციები გჭირდება ან არ გჭირდება, გადაწყვეტ რაში დაზოგო ან გადაიხადო თანხა და შეარჩევ ზუსტად იმ მოდელს რომელიც წლების მანძილზე შენი კომფორტული და ჰარმონიული ცხოვრების განუყოფელი ნაწილი იქნება.

1. ეკრანის ზომა

როცა ვსაუბრობთ ეკრანის ზომაზე, ვგულისხმობთ ეკრანის დიაგონალს, რომელიც წარმოდგენილია ინჩებში (“).

არსებობს დიაგონალის ზომის სტანდარტები 24“, 32“, 40“, 43“ და ა.შ. 1 ინჩი უდრის 2.54 სანტიმეტრს.

თუ გსურს გაიგო რამდენი სანტიმეტრია ტელევიზორი, ინჩებში მოცემული ზომა უნდა გაამრავლო 2.54-ზე და მიღებული შედეგი დაამრგვალო (მაგ: 24“ x 2.54 სმ = 61 სმ).

ეკრანის ზომის მიხედვით განისაზღვრება ოპტიმალური საყურებელი მანძილი. რეკომენდებულია, დისტანცია სამჯერ აღემატებოდეს ტელევიზორის დიაგონალის სიგრძეს. იატაკიდან კი, მინიმუმ, 1 მეტრის სიმაღლეზე უნდა იყოს განთავსებული.

2. ეკრანის რეზოლუცია

ტელევიზორის რეზოლუცია გულისხმობს ვერტიკალური და ჰორიზონტალური პიქსელების რაოდენობას.

რაც მეტია ეკრანის პიქსელების რაოდენობა, მით მკვეთრი და ხარისხიანია გამოსახულება. რეზოლუციის აღსანიშნად, გვხვდება აბრევიატურები: HD, FHD და UHD, 4K UHD, 8K UHD.

როგორ იშიფრება და რას გულისხმობს თითოეული აბრევიატურა?

HD (High Definition) – მაღალი გარჩევადობის მქონე ეკრანია, რომლის პიქსელების რაოდენობაა 1366 x 768.

FHD (Full High Definition) – სრულად მაღალი გარჩევადობის მქონე ეკრანია 1920 x 1080 პიქსელით.

UHD (Ultra High Definition) – ულტრა მაღალი გარჩევადობის ეკრანია 3840 x 2160 პიქსელით.

არსებობს 4K UHD და 8K UHD რეზოლუციის ტელევიზორები. 4 k გულისხმობს 4000-მდე პიქსელიან ჰორიზონტალურ რეზოლუციას, 8 k – 8000-მდე პიქსელიანს.

როცა ვსაუბრობთ ჩვენთვის სასურველ ტელევიზორზე, აუცილებელია გავითვალისწინოთ, რომ საქართველოში არ გვაქვს 4K და 8k ციფრული მაუწყებლობა, შესაბამისად, თუ არც გეიმერი ხარ და არც ფილმების ყურებით ხარ დაინტერესებული, შეგიძლია ბიუჯეტი დაზოგო და არ იყიდო ტელევიზორი Ultra HD (UHD) რეზოლუციით.

3. ეკრანის ტექნოლოგია და განათება: LED VS QLED VS OLED

LCD (Liquid Crystal Display) ნიშნავს თხევად კრისტალურ ეკრანს.

ყველა LCD ტიპის ტელევიზორი გამოსახულების მისაღებად იყენებს უკანა LED განათებას, რაც იშიფრება როგორც Light Emitting Diod – ეს არის დიოდური ნათება, რომელიც მუდმივად ჩართულ მდგომარეობაშია და ფერთა სიღრმეს ამ გზით გვთავაზობს. ასეთი ტელევიზორის უპირატესობა მისი ხელმისაწვდომობაა ფასის კუთხით.

QLED (Quantum dot LED) ტელევიზორი იმეორებს LED ტექნოლოგიას იმ განსხვავებით, რომ მისი შუქდიოდები აღჭურვილია კვანტური წერტილებით, რაც აუმჯობესებს გამოსახულების და ფერების გადმოცემას. QLED ტექნოლოგიას ვხვდებით SAMSUNG-ის მოდელებში 2017 წლიდან.

OLED (Organic Light Emitting Diod) – ასეთი ტიპის ტელევიზორი განათებისთვის იყენებს ორგანულ შუქდიოდებს და სრულად აკონტროლებს თითოეული პიქსელის ანთება-ჩაქრობას.

აქვს იდეალური შავი ფერის პიქსელები და თეთრი ფერის სხვადასხვა ვარიაცია, შესაბამისად, გვთავაზობს უკეთეს ფერთა გამას, იდეალურ შავ ფერს და საბოლოოდ, ძალიან მაღალი ხარისხის გამოსახულებას.

4. ეკრანის განახლების სიხშირე

სტანდარტულად, ტელევიზორები წამში 60 კადრს გვიჩვენებენ, ეს მაჩვენებელი ჰერცებში (Hz) აღინიშნება.

ეკრანის განახლების მაქსიმალური სიხშირე კი 120-240 ჰერცია. კადრების განახლების მაჩვენებელი მნიშვნელოვანია იმ შემთხვევაში, თუ გამოსახულება შეიცავს სწრაფად მოძრავ ობიექტებს.

რაც უფრო მაღალია ეკრანის განახლების სიხშირე, მით მკვეთრია სწრაფად მოძრავი გამოსახულება.

თუ გეიმერი ხარ ან ავტოსპორტი გიტაცებს, მაშინ აუცილებლად უნდა იყიდო მაღალ ჰერციანი ეკრანი, ხოლო თუ ტელევიზორის გამოყენებას მსგავსი დანიშნულებით არ აპირებ, 60 ჰერცი სრულიად საკმარისია.

5. HDR ტექნოლოგია და პროცესორი

HDR (High Dinamic Range) – არის გამოსახულების ტიპი, სადაც ერთნაირად მაღალი დეტალიზაციით არის წარმოდგენილი დაბალი, საშუალო და მაღალი სიკაშკაშის მქონე ობიექტები. HDR კონტენტის გადმოცემაში მნიშვნელოვან როლს ასრულებს გამოსახულების გადამამუშავებელი პროცესორი, რომელიც სტანდარტულ გამოსახულებას გარდაქმნის მაღალ დინამიკურ გამოსახულებად. რაც უფრო მძლავრია პროცესორი, მით უკეთეს გამოსახულებას უზრუნველყოფს მისი ალგორითმი.

რა არის Smart TV და აუცილებელია თუ არა ტელევიზორი იყოს სმარტი?

სმარტ ტელევიზორები Wi-Fi-ის საშუალებით უკავშირდება ინტერნეტს და აქვს მულტიმედიური მხარდაჭერა – ვიდეო, აუდიო, აპლიკაციები, web ბრაუზერი.

შესაძლებელია სხვადასხვა ინტერნეტ გვერდის გახსნა და ფილმების ონლაინ რეჟიმში ყურება.

ტელევიზორები სმარტ ტექნოლოგიით გაცილებით მაღალი ფასით პოზიციონირებს, ვიდრე მოდელები, რომელსაც ეს ფუნქცია არ აქვს.

თუ სმარტ ფუნქციაც გინდა და თან ფულის დაზოგვაზეც არ იტყოდი უარს, არსებობს მარტივი გამოსავალი, იყიდო სპეციალური მოწყობილობა Smart TV Box, დაუკავშირო ტელევიზორს და გაასმარტო.

ეკრანის დიზაინი: რკალისებრი VS ბრტყელი

უმეტესად, ტელევიზორებს აქვს ბრტყელი ეკრანი, თუმცა, ბაზარზე ვხვდებით მაღალბიუჯეტურ, რკალისებრ ეკრანსაც.

ასეთი ეკრანი შეიმუშავეს ადამიანის მხედველობის სპეციფიკიდან გამომდინარე. როცა პერიფერიული მხედველობა ჩართულია ტეელვიზორის ყურების პროცესში იქმნება ე.წ. ჩაძირვის ეფექტი.

აუცილებელია, რკალისებრი ეკრანის ყურებისას იმყოფებოდე გამოსახულების ცენტრის მოპირდაპირედ, წინააღმდეგ შემთხვევაში, ის ფუნქციას დაკარგავს. სხვა განსხვავება, ორი ტიპის ეკრანს შორის არ არსებობს.

ციფრული მიმღები 

DVB-T2 მხარდაჭერა – საქართველოში ციფრული მაუწყებლობის სიგნალის მისაღებად, აუცილებელია ტელევიზორს ჰქონდეს T2 სტანდარტი.

DVB-S2 მხარდაჭერა – ტელევიზორს შეუძლია სატელიტური სიგნალის მიღება.

DVB-C მხარდაჭერა – პასუხისმგებელია საკაბელო სიგნალის მიღებაზე.

ტელევიზორი მისაღები ოთახისთვის

თუ ტელევიზორს მისაღები ოთახისთვის არჩევ, უმჯობესია შეარჩიო მოდელი 40“ (102 სმ) დიაგონალით.

არ დაგავიწყდეს, კიდევ ერთხელ გაზომო რბილი ავეჯიდან ტელევიზორამდე დასაცავი დისტანცია, რომელიც სამჯერ უნდა აღემატებოდეს ეკრანის დიაგონალის სიგრძეს.

თუ დისტანცია რეკომენდაციას ვერ აკმაყოფილებს და ოთახის ფართობი მცირეა, შენი თვალების ჯანმრთელობისთვის, მოგიწევს, განიხილო 40“-ზე პატარა ზომის ტელევიზორები.

ტელევიზორი საძინებელი ოთახისთვის

ოპტიმალური ზომა საძინებელი ოთახისთვის 32“ ანუ 81 სანტიმეტრია. ამ ზომის მოდელებს  extra.ge-ზე მარტივად შეარჩევ.

გამომდინარე იქიდან, რომ საძინებელ ოთახში ტელევიზორის მთავარი ფუნქცია ფილმების ყურებაა, აჯობებს შეიძინო Full HD ან 4K რეზოლუციის სმარტ ტელევიზორი, ან იყიდო ბიუჯეტური, არასმარტ მოდელი და გაასმარტო სპეციალური მოწყობილობით.

ტელევიზორი სამზარეულოსთვის

გამომდინარე იქიდან, რომ სამზარეულო ბევრი სხვა ტექნიკით არის დატვირთული და ხშირად ტელევიზორისთვის ადგილი რთულად საპოვნელია, ყველაზე ოპტიმალური ზომა (24“) 61 სანტიმეტრი იქნება.

თუ არჩევანს სმარტ მოწყობილობაზე შეაჩერებ, სამზარეულოში ფუსფუსის პარალელურად, საყვარელი ფილმების და სატელევიზიო შოუების ნახვასაც შეძლებ და საჭიროების შემთხვევაში, კერძების რეცეპტსაც ოთახიდან გაუსვლელად, მარტივად მოიძიებ.

ტელევიზორი გეიმერებისთვის

გეიმერებს წინასწარ გაგაფრთხილებთ, რომ აქ ბიუჯეტს ნამდვილად ვერ დაზოგავთ, რადგან ვიდეო თამაშები ითხოვს უამრავ დეტალს სრულყოფილებისთვის.

• ეკრანის განახლების სიხშირე: თამაშმა რომ არ გაგიჭედოს და გამოსახულება იყოს მკვეთრი და სწრაფად მოძრავი, აუცილებელია, ტელევიზორს ჰქონდეს მინუმუმ, 120 ჰერციანი განახლება და Motion Blur ფუნქცია.
• HDR ტექნოლოგია: მაღალი დინამიკური დიაპაზონის გარეშე წარმოუდგენელია გამოსახულების მაქსიმალური დეტალიზაცია, რეალისტური ფერების და კონტრასტის სინთეზი.
• 4K UHD რეზოლუცია: იმისთვის, რომ HDR ტექნოლოგიამ სრული შესაძლებლობებით იმუშაოს, გადამწყვეტი მნიშვნელობა აქვს ეკრანის გარჩევადობას და პიქსელებს, აუცილებელია ტელევიზორს ჰქონდეს ფერთა დიდი გამა და მაღალი სიკაშკაშე.
• თამაშისთვის გაცილებით მოსახერხებელია დიდი ზომის ტელევიზორი. საუკეთესო გადაწყვეტილება იქნება ტელევიზორი OLED განათების ტექნოლოგიით.

extra.ge-ზე შეძლებ მარტივად შეარჩიო შენი ფავორიტი ბრენდის ტელევიზორი ყველა საჭირო ფუნქციონალით.