როგორ გამოვიყენოთ ეპილატორი – სრული გზამკვლევი

არასასურველი თმის მოშორება ხშირად დისკომფორტთან, ტკივილთან და დიდ დროსთან ასოცირდება. თუ ეძებ ხანგრძლივ და ეკონომიურ შედეგს სალონში ზედმეტი ვიზიტების გარეშე, ეპილატორი საუკეთესო არჩევანია – ის უზრუნველყოფს იდეალურად გლუვ კანს 3-დან 4 კვირამდე.

იმისთვის, რომ პროცედურა მაქსიმალურად უმტკივნეულო იყოს, თავიდან აირიდო გაღიზიანება და თმის ჩაბრუნება, აუცილებელია, იცოდე მოხმარების სწორი წესები. ამ გზამკვლევში ნაბიჯ-ნაბიჯ გაიგებ, როგორ მოამზადო კანი, როგორ გამოიყენო აპარატი სწორად და როგორ მოუარო სხეულს პროცედურის შემდეგ.

1. კანის მომზადება: რა უნდა გააკეთო ეპილაციამდე?

სწორი მომზადება წარმატებული ეპილაციის 70%-ია. თუ კანს წინასწარ არ მოამზადებ, ტკივილიც მეტი იქნება და თმის ჩაბრუნების რისკიც გაიზრდება.

• დაისკრაბე: პროცედურამდე 24 საათით ადრე გამოიყენე ტანის სკრაბი ან სპეციალური ხელთათმანი. ეს მოგაშორებს მკვდარ უჯრედებს, წამოწევს ჩაბრუნებულ თმებს და ეპილატორს გაუადვილებს მათ დაჭერას.
• აკონტროლე თმის სიგრძე: იდეალური სიგრძეა 2-დან 5 მილიმეტრამდე. თუ თმა ძალიან გრძელია, პროცესი უფრო მტკივნეული გახდება; ზედმეტად მოკლე ღერებს კი აპარატი უბრალოდ ვერ ჩაეჭიდება. საჭიროების შემთხვევაში, წინასწარ შეამოკლე თმა ტრიმერით.
• მიიღე თბილი შხაპი: თბილი წყალი და ორთქლი ხსნის ფორებს და არბილებს თმის ძირებს, რაც პროცესს ბევრად მარტივსა და ნაკლებად მგრძნობიარეს ხდის.
• დარწმუნდი, რომ კანი სუფთაა: მშრალი ეპილაციის დაწყებამდე კანი კარგად გაიმშრალე. მასზე არ უნდა გესვას ზეთი, ლოსიონი ან კრემი, რათა პინცეტებს მოჭიდება არ გაუჭირდეს.

2. ეტაპობრივი ინსტრუქცია: როგორ გამოიყენო ეპილატორი

კანის მომზადების შემდეგ მიჰყევი მარტივ ნაბიჯებს:

• დაიჭირე ეპილატორი სწორი კუთხით: აპარატი ყოველთვის გეჭიროს კანის მიმართ 90 გრადუსიანი კუთხით. არ დააწვე ძლიერად, ეპილატორი მსუბუქად უნდა სრიალებდეს კანის ზედაპირზე.
• გადაჭიმე კანი თავისუფალი ხელით: ეს ერთ-ერთი მთავარი საიდუმლოა. კანის დაჭიმვა საგრძნობლად ამცირებს ტკივილს და მოწყობილობას ეხმარება, თითოეული ღერი ფესვიდან ამოიღოს ისე, რომ კანი არ ჩაიყოლოს.
• ამოძრავე თმის ზრდის საწინააღმდეგოდ: ეპილატორი ამოძრავე ნელა და თანაბრად, ქვემოდან ზემოთ (თმის ზრდის საპირისპიროდ). ნუ იჩქარებ, სწრაფი მოძრაობისას პინცეტები თმას ძირიანად ამოღების ნაცვლად გადატეხავს.
• დაიწყე დაბალი სიჩქარით: თუ ეპილატორს პირველად იყენებ, ჩართე პირველი (დაბალი) სიჩქარე, რომ კანი ეტაპობრივად შეეჩვიოს შეგრძნებას. შედარებით თხელი თმისთვის ან გამოცდილების მიღების შემდეგ კი გადადი მაღალ სიჩქარეზე.

3. მშრალი თუ სველი ეპილაცია: რომელი ჯობია?

• მშრალი ეპილაცია: ტრადიციული და ძალიან ეფექტური მეთოდია, განსაკუთრებით მაშინ, როცა დროში შეზღუდული ხარ.
• სველი ეპილაცია (Wet & Dry): თუ წყალგამძლე მოდელი გაქვს, შეგიძლია გამოიყენო პირდაპირ აბაზანაში ან შხაპის ქვეშ. თბილი წყალი ბუნებრივი ტკივილგამაყუჩებელივით მოქმედებს, ამშვიდებს რეცეპტორებს და პროცესს განსაკუთრებით კომფორტულს ხდის დამწყებთათვის.

4. კანის მოვლა ეპილაციის შემდეგ

• დაიმშვიდე კანი: პროცედურის შემდეგ მცირე სიწითლე სრულიად ბუნებრივი რეაქციაა. წაისვი ალოე ვერას გელი, პანთენოლი ან დამამშვიდებელი ლოსიონი, რომელიც არ შეიცავს სპირტს.
• მოერიდე გამღიზიანებლებს: მომდევნო 24 საათის განმავლობაში თავი შეიკავე მზის აბაზანებისგან, საუნისგან, ცხელი შხაპისა და ქლორირებული აუზისგან. ასევე, ჩაიცვი თავისუფალი, ბუნებრივი ქსოვილის ტანსაცმელი.
• არ დაგავიწყდეს დატენიანება: რეგულარულად დაიტენიანე კანი და ეპილაციიდან 2-3 დღის შემდეგ კვირაში ერთხელ ისევ გამოიყენე სკრაბი, რათა თმის ჩაბრუნება თავიდან აიცილო.

5. მნიშვნელოვანი დეტალები და ხრიკები უნაკლო შედეგისთვის

იმისთვის, რომ ეპილატორის მოხმარება კიდევ უფრო მარტივი და კომფორტული გახდეს, გაითვალისწინე ეს პრაქტიკული რჩევები:

როგორ შევამციროთ ტკივილი?

პირველი პროცედურა ყოველთვის ყველაზე მგრძნობიარეა, რადგან თმა შედარებით უხეშია. ყოველი მომდევნო გამოყენებისას ღერი თხელდება, კანი ეჩვევა და დისკომფორტი მინიმუმამდე დადის. ტკივილის შესამცირებლად ეპილატორი გამოიყენე თბილი შხაპის შემდეგ, კარგად დაჭიმე კანი და პროცედურამდე ან მის შემდეგ მიიდე გამაგრილებელი ხელთათმანი.

ეპილატორი ბიკინის ზონასა და იღლიებში – როგორ გამოვიყენოთ უსაფრთხოდ?

მგრძნობიარე ზონებში ეპილაცია სრულიად შესაძლებელია, მთავარია გამოიყენო კომპლექტში შემავალი სპეციალური შემზღუდავი საცმები.

ისინი ფარავს პინცეტების ნაწილს, ამცირებს უშუალო კონტაქტს და იცავს ნაზ კანს ზედმეტი გაღიზიანებისგან. იმუშავე, აუცილებლად, პირველ სიჩქარეზე და პატარ-პატარა მონაკვეთებად.

ჩაბრუნებული თმის პრევენცია

• თმის ჩაბრუნების მთავარი მიზეზი კანის ზედაპირზე დაგროვილი მკვდარი უჯრედებია. დაისკრაბე კანი კვირაში 1-2-ჯერ. ყოველდღიური დატენიანება ამ პრობლემას სამუდამოდ მოგიხსნის.
• ასევე, ყოველთვის აკონტროლე, რომ მოწყობილობა მოძრაობდეს თმის ზრდის საპირისპიროდ – ასე ღერი ძირიანად ამოვა.

საუკეთესო დრო ეპილაციისთვის

იდეალური დროა საღამო, ძილის წინ. პროცედურის შემდეგ წარმოქმნილი მსუბუქი სიწითლე მთელი ღამის განმავლობაში მშვიდდება, დილით კი გაიღვიძებ იდეალურად გლუვი, დასვენებული კანით.

ეპილატორი თუ ჩვეულებრივი საპარსი?

საპარსი ან დეპილაციური კრემი თმას ჭრის მხოლოდ კანის ზედაპირზე, ამიტომ შედეგი, მაქსიმუმ, 1-2 დღე გრძელდება და ამოსული ღერი უხეშია.

ეპილატორი თმას ფესვიანად აშორებს, უზრუნველყოფს 3-4 კვირიან სიგლუვეს და რეგულარული გამოყენებისას თმას საგრძნობლად ასუსტებს და ათხელებს.

როგორ გავწმინდოთ და შევინახოთ მოწყობილობა?

ჰიგიენა ეპილატორის გამართული მუშაობისა და კანის ჯანმრთელობის გარანტიაა. ყოველი პროცედურის შემდეგ მოხსენი თავაკი, გაასუფთავე მოყოლილი ჯაგრისით და დეზინფექციისთვის გადაუსვი სპირტიანი ტამპონი.

თუ მოდელი წყალგამძლეა, თავაკი შეგიძლია გამდინარე წყალშიც გარეცხო (ოღონდ აუცილებლად კარგად გააშრე აწყობამდე).

სად იყიდება ეპილატორი?

მსოფლიოს წამყვანი ბრენდების ორიგინალი ეპილატორების ყველაზე ფართო არჩევანი ექსტრა მარკეტფლეისზე გეგულება.

თუ ყიდვას აპირებ, გაითალისწინე რჩევები და შეარჩიე შენთვის საუკეთესო მოდელი.

ხოლო თუ შერჩევაში დახმარება დაგჭირდება, გაეცანი ჩვენს წინა ბლოგს, სადაც ყველა საჭირო ინფორმაცია დაგხვდება.