თუ გიყვარს ხრაშუნა კარტოფილი, წვნიანი ქათამი, შემწვარი ბოსტნეული ან უბრალოდ გინდა სამზარეულოში ნაკლები დრო გაატარო, შენს სამზარეულოს აუცილებლად უნდა ამშვენებდეს აეროგრილი.
ეს მოყობილობა, ერთი შეხედვით, პატარა ღუმელს ჰგავს, თუმცა, მუშაობის პრინციპი განსხვავებულია: საჭმელს დიდი რაოდენობით ზეთში არ წვავ და ცხელი ჰაერის ინტენსიური ცირკულაციის დახმარებით ამზადებ.
მაგრამ როგორ ხდება ეს? რატომ იღებს კარტოფილი ხრაშუნა ქერქს, ხოლო ქათამი შიგნით წვნიანი რჩება? და როგორ უნდა გამოიყენო აეროგრილი ისე, რომ კერძი ნამდვილად გემრიელი გამოვიდეს? – ამ ბლოგიდან გაიგებ.
როგორ ამზადებს კერძებს აეროგრილი
აეროგრილის მთავარი სამუშაო ცხელი ჰაერის ცირკულაციაა. მოწყობილობაში მოთავსებული გამაცხელებელი ელემენტი ჰაერს აცხელებს, ძლიერი ვენტილატორი კი ამ ცხელ ჰაერს საკვების გარშემო სწრაფად ატრიალებს.
ეს პროცესი ქმნის საკვების ზედაპირზე ხრაშუნა, დაბრაწულ ფენას. ამიტომ, აეროგრილში შეგიძლია მოამზადო ისეთი კერძები, რომლებსაც ტრადიციულად შეწვა ან ღუმელში გამოცხობა სჭირდება.
მნიშვნელოვანია ისიც, რომ ცხელი ჰაერი საკვებს სხვადასხვა მხრიდან ხვდება. ამიტომ სპეციალურ კალათაში პროდუქტების სწორად განაწილებას დიდი მნიშვნელობა აქვს.
რატომ არ უნდა გადატვირთო კალათა
ერთ-ერთი ყველაზე გავრცელებული შეცდომა აეროგრილის გამოყენებისას კალათის ზედმეტად გავსებაა. შეიძლება იფიქრო, რომ თუ უფრო მეტ პროდუქტს ჩაყრი, ერთ ჯერზე მეტ საჭმელს მოამზადებ და დროსაც დაზოგავ, მაგრამ შედეგი ხშირად საპირისპიროა.
თუ პროდუქტები ერთმანეთზე მჭიდროდ არის განლაგებული, ცხელი ჰაერი მათ შორის თავისუფლად ვეღარ მოძრაობს. შედეგად, ერთი ნაწილი შეიძლება კარგად დაიბრაწოს, მეორე კი რბილი და ნაკლებად მომზადებული დარჩეს.
ამიტომ ეცადე, პროდუქტებს შორის მცირე სივრცე დატოვო. განსაკუთრებით მნიშვნელოვანია ეს კარტოფილის, ქათმის ფრთების, ბოსტნეულის და სხვა ისეთი საკვების მომზადებისას, რომლის ზედაპირიც ხრაშუნა უნდა იყოს.
თუ დიდი რაოდენობის საჭმელი გაქვს მოსამზადებელი, ჯობს, რამდენიმე ეტაპად მოამზადო, ვიდრე ყველაფერი ერთდროულად ჩაყარო.
საჭიროა თუ არა ზეთი
აეროგრილის ერთ-ერთი მთავარი უპირატესობა ის არის, რომ დიდი რაოდენობით ზეთი არ გჭირდება. თუმცა ეს არ ნიშნავს, რომ ზეთის გამოყენება საერთოდ არ შეიძლება.
ზოგიერთ პროდუქტს მცირე რაოდენობით ზეთის დამატება უკეთეს ტექსტურასა და დაბრაწულ ფერს აძლევს. მაგალითად, კარტოფილს შეგიძლია ძალიან ცოტა ზეთი მოასხა ან სპეციალური სპრეით მსუბუქად დაფარო.
გააცხელე აეროგრილი წინასწარ
აეროგრილის წინასწარი გაცხელება ყოველთვის აუცილებელი არ არის, თუმცა, ზოგიერთი კერძისთვის ნამდვილად სასარგებლოა.
თუ გინდა, რომ საკვების ზედაპირი სწრაფად დაიბრაწოს და ხრაშუნა ქერქი მიიღოს, წინასწარ გაცხელებული აეროგრილი უკეთეს შედეგს მოგცემს.
განსაკუთრებით გამოგადგება ეს ხორცის, ქათმის, კარტოფილისა და ცომეული პროდუქტების მომზადებისას.
თუ კონკრეტული მოდელის ინსტრუქციაში წინასწარ გაცხელებასთან დაკავშირებით რეკომენდაციაა მოცემული, უმჯობესია, სწორედ მას მიჰყვე.
რა ტემპერატურაზე უნდა მოამზადო საკვები
აეროგრილში მომზადებისას ტემპერატურა კერძის მიხედვით უნდა შეარჩიო. ძალიან მაღალი ტემპერატურის არჩევა ყოველთვის საუკეთესო შედეგს არ იძლევა. გარედან შეიძლება საკვები სწრაფად დაიბრაწოს, შიგნით კი ჯერ კიდევ მოუმზადებელი დარჩეს.
ამიტომ განსაკუთრებით ხორცისა და ქათმის შემთხვევაში, მხოლოდ გარეგნობას ნუ დაეყრდნობი, დარწმუნდი, რომ პროდუქტი შიგნიდანაც სრულად მომზადებულია.
კარტოფილისა და ბოსტნეულის შემთხვევაში, შეგიძლია, მომზადების პროცესში ერთხელ შეანჯღრიო კალათა ან პროდუქტები გადააბრუნო. ასე უფრო თანაბრად დაიბრაწება.
კიდევ რა შეგიძლია მოამზადო აეროგრილში
აეროგრილი მხოლოდ კარტოფილისა და ქათმისთვის არ არის. მისი გამოყენება შეგიძლია უამრავი კერძისთვის: ხორცისთვის, თევზისთვის, ბოსტნეულისთვის, სენდვიჩებისთვის, ცომეულისთვის და ზოგიერთი დესერტისთვისაც.
შეგიძლია მოამზადო ხრაშუნა ქათმის ფილე, შემწვარი ბოსტნეული, კარტოფილი, სოსისი, პატარა პიცა ან ღუმელში გამოსაცხობი სხვა კერძები.
- კარგი შედეგის მისაღებად მთავარი არა მხოლოდ ტემპერატურისა და დროის სწორად შერჩევაა, არამედ პროდუქტის მომზადების წესიც. მაგალითად, ზედმეტად სველი პროდუქტები შეიძლება ისეთი ხრაშუნა ვერ გამოვიდეს, როგორც ელოდები.
- მომზადების დასრულების შემდეგ აეროგრილის გაწმენდა არ გადადო. თუ ცხიმსა და საკვების ნარჩენებს კალათაში დიდხანს დატოვებ, მოგვიანებით, მათი მოშორება გაცილებით რთული იქნება. მთავარია, აეროგრილის ელექტრო ნაწილი წყალში არ ჩადო და გაწმენდისას ყოველთვის გაითვალისწინო მწარმოებლის ინსტრუქცია.
თუ აეროგრილს პირველად იყენებ, თავიდანვე ნუ გამოცდი ყველა რეჟიმს. დაიწყე მარტივი კერძებით და დააკვირდი, როგორ მუშაობს კონკრეტული მოდელი.
ახლა უკვე იცი, როგორ მუშაობს და რამდენი შესაძლებლობა აქვს აეროგრილს. ამიტომ, თუ ჯერ კიდევ არ გაქვს, დროა, შენს სამზარეულოშიც დაიმკვიდროს ადგილი.
შეარჩიე სასურველი მოდელი ექსტრა მარკეტფლეისზე.
