ჭურჭლის სარეცხი მანქანის არჩევა ერთი შეხედვით მარტივია: დაათავლიერებ რამდენიმე მოდელს, შეადარებ ფასებს და იმას იყიდი, რომელიც ყველაზე მეტად მოგეწონება. თუმცა, რეალურად საქმე ცოტა უფრო რთულადაა. სხვადასხვა მოდელს განსხვავებული ტევადობა, პროგრამები, ხმაურის დონე, გაშრობის სისტემა და დამატებითი ფუნქციები აქვს.
კითხვაზე თუ რომელი ჭურჭლის სარეცხი მანქანა ჯობია პასუხი შენს საჭიროებებზეა დამოკიდებული. პატარა სამზარეულო გაქვს თუ დიდი, მარტო ცხოვრობ თუ ოჯახი გყავს, ხშირად ამზადებ თუ ჭურჭლის რაოდენობა მცირეა?
სანამ კონკრეტულ ტექნიკას შეიძენ, აჯობებს, რამდენიმე მნიშვნელოვანი დეტალი გაითვალისწინო. მარტივად მიხვდები, რომელი ჭურჭლის სარეცხი მანქანა გამოგადგება ყოველდღიურად და რაში არ ღირს ზედმეტი თანხის გადახდა.
ჩასაშენებელი თუ ცალკე მდგომი ჭურჭლის სარეცხი მანქანა
- თუ სამზარეულოს ახლა აწყობ ან რემონტს აკეთებ, შეიძლება ჩასაშენებელი ჭურჭლის სარეცხი მანქანა უფრო მოგეწონოს. ის ავეჯში ინტეგრირდება და სამზარეულოს ერთიან, მინიმალისტურ იერს ინარჩუნებს.
- თუ უკვე მოწყობილი სამზარეულო გაქვს და ავეჯის შეცვლა არ გინდა, ცალკე მდგომი მოდელი უფრო მოქნილი არჩევანია. მისი მთავარი უპირატესობა ისაა, რომ ინსტალაციის მხრივ მეტი თავისუფლება გაქვს.
აქ მთავარი არა ის არის, რომელი ტიპია უკეთესი, არამედ ის, რომელი უფრო ლოგიკურად ერგება შენს სივრცეს.
ზომა და ტევადობა
- დიდი ტევადობის მქონე ჭურჭლის სარეცხი მანქანა განსაკუთრებით მოსახერხებელია მაშინ, როცა ერთდროულად გიწევს თეფშების, ჭიქების, ქვაბების, ტაფებისა და სხვა ნივთების გარეცხვა. ასეთია 60 სმ-იანი ჭურჭლის სარეცხი მანქანები.
- 45 სმ-იანი ვიწრო მოდელები კი პატარა სამზარეულოსა და მცირე ოჯახისთვის უფრო მოსახერხებელია. ნაკლებ ადგილს იკავებს, თუმცა, ტევადობაც მცირე აქვს.
თუ სამზარეულოში საკმარისი სივრცე გაქვს, დაფიქრდი, ნამდვილად გჭირდება თუ არა ვიწრო მოდელი. თუ ჭურჭლის დიდი რაოდენობა ხშირად გიგროვდება, უფრო დიდი ტევადობა ყოველდღიურ ცხოვრებას საგრძნობლად გაგიმარტივებს.
ვიდრე არჩევანს გააკეთებ, აუცილებლად გაზომე ადგილი, სადაც ტექნიკის დაყენებას აპირებ: სიგანე, სიმაღლე და სიღრმე.
ხმაურის დონე – დეტალი, რომელიც მნიშვნელოვანია
ხმაურის დონე დეციბელებში (dB) იზომება. რაც უფრო დაბალია მაჩვენებელი, მით უფრო ჩუმად მუშაობს ტექნიკა. დაახლოებით 40–45 dB-ის ფარგლებში არსებული მოდელები საკმაოდ მშვიდად მუშაობს.
თუ შენი სამზარეულო მისაღებ ოთახთანაა გაერთიანებული, არასასურველია, რომ ტელევიზორის ყურებისას ან სტუმრებთან საუბრისას ჭურჭლის სარეცხი მანქანის ხმა გესმოდეს.
თუ მანქანის ღამით ჩართვასაც აპირებ, ხმაურის დონე ერთ-ერთ მთავარ კრიტერიუმად აქციე. რამდენიმე დამატებითი ფუნქციის გამო ხმაურიანი მოდელის არჩევა ნამდვილად არ ღირს და ამ განსხვავებას ყოველდღე შეამჩნევ.
ენერგოეფექტურობა – მხოლოდ ყიდვის ფასი არ უნდა დათვალო
ჭურჭლის სარეცხი მანქანის ღირებულება მხოლოდ ის თანხა არ არის, რომელსაც შეძენისას იხდი. ტექნიკას წლების განმავლობაში გამოიყენებ, ამიტომ მნიშვნელოვანია, რამდენ ელექტროენერგიასა და წყალს მოიხმარს.
შედარებისას შეამოწმე ენერგოეფექტურობის მაჩვენებელი, წყლის მოხმარება და კონკრეტული პროგრამების ხარჯი.
ენერგოეფექტური მოდელის არჩევა, გრძელვადიან პერსპექტივაში, დაგიზოგავს თანხებს, განსაკუთრებით მაშინ, თუ მანქანის ხშირად გამოყენებას აპირებ.
პროგრამების რაოდენობა – ბევრი ყოველთვის უკეთესს არ ნიშნავს
ჭურჭლის სარეცხი მანქანა ბევრი პროგრამით შეიძლება ძალიან შთამბეჭდავად გამოიყურებოდეს, მაგრამ დაფიქრდი, რეალურად რამდენს გამოიყენებ?
ყოველდღიური გამოყენებისთვის რამდენიმე კარგი პროგრამა ხშირად სრულიად საკმარისია. მაგალითად, ეკონომიური, სწრაფი, ინტენსიური, ავტომატური და დელიკატური რეცხვის პროგრამები ყველაზე პრაქტიკული რეჟიმებია.
თუ მსუბუქად დაბინძურებული ჭურჭლის სწრაფად გარეცხვა გინდა, სწრაფი პროგრამა გამოგადგება. ქვაბებისა და ტაფებისთვის კი ინტენსიური რეჟიმი უფრო მნიშვნელოვანია.
ამიტომ ნუ გადაიხდი დამატებით ათეულობით ფუნქციაში, რომელსაც პრაქტიკულად არასდროს გამოიყენებ.
კარგი გაშრობა ისეთივე მნიშვნელოვანია, როგორც კარგი რეცხვა
ყიდვისას, პირველ რიგში, გაშრობის ტექნოლოგიას შეხედე. თანამედროვე ჭურჭლის სარეცხ მანქანებში რამდენიმე ტიპის სისტემა გვხვდება. ზოგიერთ მოდელში გაშრობა ხდება ჭურჭელზე დარჩენილი სითბოსა და ბუნებრივი აორთქლების ხარჯზე, უფრო მოწინავე მოდელებში კი გამოიყენება კონდენსაციური, ტურბო ან სპეციალური ავტომატური გაშრობის სისტემები.
თუ შენთვის განსაკუთრებით მნიშვნელოვანია, რომ ჭურჭელი პროგრამის დასრულებისთანავე მაქსიმალურად მშრალი იყოს, არჩევისას უფრო მაღალი კლასის გაშრობის მქონე მოდელს მიანიჭე უპირატესობა.
ასევე, ყურადღება მიაქციე, რომ კარი ავტომატურად იღებოდეს. ზოგიერთ მანქანაში ციკლის ბოლოს კარი ოდნავ იღება, რაც ორთქლის გამოსვლას და ჭურჭლის უკეთ გაშრობას უწყობს ხელს.
მესამე კალათა
თუ ოდესმე ჭურჭლის სარეცხი მანქანა გქონია, ალბათ, იცი რამდენად მარტივად შეიძლება დანა-ჩანგალმა ადგილი წაიღოს.
ზედა, მესამე კალათა ამ პრობლემას საკმაოდ კარგად აგვარებს. ის განკუთვნილია დანა-ჩანგლისა და პატარა ნივთებისთვის და ქვედა კალათაში უფრო მეტ სივრცეს ტოვებს თეფშებისთვის, ქვაბებისა და ტაფებისთვის.
ამიტომ, თუ ორ მსგავს მოდელს ადარებ და ერთს მესამე კალათა აქვს, მეორეს კი არა, აუცილებლად დაფიქრდი, რამდენად გამოგადგება ეს ყოველდღიურად.
ასევე, ყურადღება მიაქციე რეგულირებად კალათებსა და დასაკეც საყრდენებს – ისინი საშუალებას გაძლევს, მანქანის შიდა სივრცე სხვადასხვა ტიპის ჭურჭელს მოარგო.
ნახევარი დატვირთვის რეჟიმი
ნახევარი დატვირთვის ფუნქცია საშუალებას გაძლევს მცირე რაოდენობის ჭურჭელიც გარეცხო, ნაცვლად იმისა, რომ მანქანის სრულად შევსებას დაელოდო. ამიტომ, თუ ხშირად გაქვს მცირე რაოდენობის ჭურჭელი, ამ ფუნქციას აუცილებლად მიაქციე ყურადღება.
AquaStop და გაჟონვისგან დაცვა
ჭურჭლის სარეცხი მანქანის უსაფრთხოება მნიშვნელოვანია. შეძენამდე გადაამოწმე, აქვს თუ არა კონკრეტულ მოდელს AquaStop ან სხვა ტიპის გაჟონვისგან დაცვის მექანიზმი – ეს დამატებითი სიმშვიდეა.
ინვერტორული ძრავა
ინვერტორული ძრავები თანამედროვე ჭურჭლის სარეცხ მანქანებში ხშირად გამოიყენება და მათი ერთ-ერთი მნიშვნელოვანი უპირატესობა მშვიდი მუშაობაა. თუმცა, კონკრეტული მოდელის ენერგომოხმარება, ხმაურის დონე და სხვა მახასიათებლები ცალკე უნდა შეაფასო.
თუ არჩევანს ორ მსგავს მოდელს შორის აკეთებ, რომელთაგან ერთს ინვერტორული ძრავა აქვს, ეს ნამდვილად საინტერესო უპირატესობაა.
როგორც ხედავ, საუკეთესო ჭურჭლის სარეცხი მანქანა ის არ არის, რომელსაც ყველაზე მეტი პროგრამა ან ყველაზე მაღალი ფასი აქვს. შენთვის კარგი მოდელი ის იქნება, რომელიც შენს ყოველდღიურ ცხოვრებას გაამარტივებს.
დაათვალიერე ექსტრა მარკეტფლეისზე.
