როგორ დავაყენოთ ტელევიზორი სწორად მისაღებ ოთახში

ტელევიზორი მისაღები ოთახის ერთ-ერთი მთავარი ელემენტია – სწორედ მის გარშემო იქმნება ოჯახური საღამოები, ვუყურებთ ფილმებს.

თუ ტელევიზორი არასწორადაა განთავსებული, ეკრანის ყურებისას, შეიძლება დისკომფორტიც შეგექმნას: თვალების დაღლა, კისრის ტკივილი ან უბრალოდ ცუდი ხედვა. ამიტომ, თუ გინდა მაქსიმალურად ისიამოვნო ტელევიზორის ჩვენებით, მნიშვნელოვანია, სწორად შეარჩიო მისი ადგილი.

განათავსე ტელევიზორი სწორ სიმაღლეზე

პირველი, რაც უნდა გაითვალისწინო, არის ტელევიზორის სიმაღლე. იდეალური ვარიანტია, როცა ეკრანის ცენტრი შენი თვალების დონეზეა, როცა ზიხარ.

თუ ტელევიზორი ძალიან მაღლაა დაკიდებული (მაგალითად, ბუხრის ზემოთ), მოგიწევს კისრის აწევა, რაც დროთა განმავლობაში საკმაოდ დამღლელია.

თუ დივანზე ზიხარ, ეცადე, რომ ტელევიზორის ქვედა ნაწილი დაახლოებით 50–70 სმ სიმაღლეზე იყოს იატაკიდან – ეს საშუალო რეკომენდაციაა, თუმცა, საბოლოოდ შენი კომფორტით უნდა იხელმძღვანელო.

დაიცავი მანძილი ტელევიზორსა და დივანს შორის

ტელევიზორის ზომასთან შესაბამისი მანძილი ძალიან მნიშვნელოვანია. თუ ძალიან ახლოს ზიხარ, თვალები დაიღლება, ხოლო თუ ძალიან შორს – დეტალებს ვერ დაინახავ. ზოგადი წესი კი ასეთია:

• 43–50 ინჩიანი ტელევიზორი – დაახლოებით, 5–2 მეტრი
• 55–65 ინჩიანი – 2–3 მეტრი
• 75+ ინჩიანი – 3 მეტრზე მეტი

თუ 4K ტელევიზორი გაქვს, შეგიძლია ოდნავ ახლოსაც დაჯდე, რადგან მაღალი რეზოლუცია გამოსახულებას არ ამახინჯებს.

სინათლე და ანარეკლები – ნუ დაუშვებ შეცდომას

ძალიან ხშირი შეცდომაა ტელევიზორის ფანჯრის პირდაპირ ან მის წინ განთავსება. შედეგად ეკრანზე ჩნდება ანარეკლები, რაც ყურებას ართულებს.

ტელევიზორი განათავსე ისე, რომ ფანჯარა გვერდზე იყოს და არა პირდაპირ წინ ან უკან. თუ ეს ვერ ხერხდება, გამოიყენე ფარდები ან ჟალუზები, რათა აკონტროლო სინათლე.

კედელზე დაკიდება ჯობია თუ ტუმბოზე დადგმა?

აქ არჩევანი შენს სივრცესა და სტილზეა დამოკიდებული.

კედელზე დაკიდება უფრო თანამედროვე და მინიმალისტური ვარიანტია, ზოგავს სივრცეს და ოთახს უფრო მოწესრიგებულ იერს აძლევს. მნიშვნელოვანია, რომ გამოიყენო ხარისხიანი სამაგრი და სწორად დაამონტაჟო.

ტუმბოზე დადგმა უფრო მარტივი და მოქნილი ვარიანტია. შეგიძლია მარტივად შეცვალო ადგილი. ასევე, დამატებითი სივრცე გექნება დეკორისთვის ან ტექნიკისთვის.

თუ კედელზე კიდებ, დარწმუნდი, რომ ტელევიზორი სწორ კუთხეშია და არ არის გადახრილი, იდეალურად უნდა უყურებდე პირდაპირ, არა ზემოდან ან ქვემოდან.

არ დაგავიწყდეს ხმის ხარისხიც

ხშირად, ადამიანები მხოლოდ გამოსახულებაზე ფიქრობენ, მაგრამ ხმა არანაკლებ მნიშვნელოვანია. თუ ტელევიზორი კედელზეა ძალიან ახლოს მიბჯენილი ან კუთხეშია მოქცეული, ხმა შეიძლება დაიკარგოს ან დამახინჯდეს.

საუკეთესო შედეგისთვის დატოვე მცირე სივრცე ტელევიზორსა და კედელს შორის ან გამოიყენე დამატებითი აუდიო სისტემა “საუნდბარი”.

ინტერიერთან ჰარმონია

ტელევიზორი არ უნდა იყოს მხოლოდ ტექნიკა, ის შენი ინტერიერის ნაწილიცაა. ეცადე, რომ მისი განთავსება შეესაბამებოდეს ოთახის სტილს.

• თუ მინიმალისტურ ინტერიერს ქმნი, კედელზე დაკიდებული ტელევიზორი დამალული კაბელებით კარგი გადაწყვეტილებაა.
• თუ უფრო კლასიკური სტილი გაქვს, ლამაზი ტუმბო და დეკორატიული ელემენტები უკეთესად მოერგება.

კომფორტი ყველაზე მნიშვნელოვანია, ამიტომ განათავსე ტელევიზორი ისე, როგორც შენთვის უფრო მოსახერხებელი იქნება. შეიძლება ზოგადი წესები დაგეხმაროს, მაგრამ საბოლოოდ შენ უნდა იგრძნო თავი კარგად – იქნება ეს ფილმის ყურება, თამაში თუ სხვა.

ტელევიზორის სწორად განთავსების შემთხვევაში, მისაღები ოთახი გახდება ადგილი, სადაც ნამდვილად გესიამოვნება დროის გატარება.