მაცივარი სამზარეულოს ის ერთ-ერთი ყველაზე მთავარი ტექნიკაა, რომელიც კომფორტს ყოველდღიურად გვიქმნის. მისი განსაკუთრებული მნიშვნელობა მაშინ გვახსენდება როგორც კი აღმოვაჩენთ, რომ რაღაც რიგზე ვერ არის.
მაცივრის გაუმართაობა პირდაპირ აისახება პროდუქტების ხარისხზე, რაც ჩვენს ჯანმრთელობას უკავშირდება. სწორედ ამიტომ, მოგიმზადეთ ბლოგი, რომელიც მაცივრის პრობლემების მოგვარებაში დაგეხმარება. გაიგებ რას უნდა მიაქციო ყურადღება და როდის გვჭირდება პროფესიონალის ჩარევა.
თუ შენც შენიშნე, რომ მაცივარი სათანადოდ აღარ აციებს, მნიშვნელოვანია, მშვიდად და ეტაპობრივად გადაამოწმო შესაძლო მიზეზები. ხშირად პრობლემა მარტივად მოგვარებადია, თუმცა არის შემთხვევები, როდესაც პროფესიონალის ჩარევა აუცილებელია.
რატომ არ აციებს მაცივარი?
პირველი და ყველაზე მარტივი მიზეზი შეიძლება ტემპერატურის არასწორი პარამეტრი იყოს.
ზოგჯერ, მაცივრის წმენდისას თერმოსტატი მექანიკურად ირევა ან სეზონის ცვლილებისას, არ ვაყენებთ ტემპერატურას შესაბამისად.
ზოგადად, მაცივრის განყოფილებაში ოპტიმალური ტემპერატურა +2°C-დან +5°C-მდეა, ხოლო საყინულეში -18°C.
უფრო კონკრეტულად, მაცივრის ტემპერატურა სეზონის მიხედვით ასე უნდა გამოიყურებოდეს:
- ზამთარი: მაცივრის განყოფილება დააყენე დაახლოებით +3°C – +5°C-ზე, საყინულე -18°C-ზე. დაბალი გარემო ტემპერატურის გამო მოწყობილობას ნაკლები დატვირთვა აქვს.
- გაზაფხული: მაცივარი შეინარჩუნე +3°C – +4°C-ზე, საყინულე ისევ -18°C. ტემპერატურის ცვალებადობის გამო, მნიშვნელოვანია, სტაბილური რეჟიმი.
- ზაფხული: მაცივრის განყოფილება უმჯობესია დააყენო +2°C – +3°C-ზე, რადგან მაღალი გარემო ტემპერატურა შიდა სიცივეს ამცირებს. საყინულე დატოვე -18°C ან საჭიროების შემთხვევაში, -19°C.
- შემოდგომა: ოპტიმალურია +3°C – +4°C მაცივარში და -18°C საყინულეში. სეზონის დასაწყისში, როდესაც ჯერ კიდევ თბილია, შეგიძლია ოდნავ უფრო დაბალი ტემპერატურა შეინარჩუნო.
კარის არასაკმარისი ჰერმეტულობა კიდევ ერთი გავრცელებული მიზეზია. თუ რეზინის შემაკავებელი დაზიანებულია ან კარი ბოლომდე არ იხურება, ცივი ჰაერი გარეთ გამოდის და მაცივარი ვერ ინარჩუნებს სტაბილურ ტემპერატურას. დროთა განმავლობაში, რეზინა კარგავს ელასტიკურობას და საჭიროებს შეცვლას.
მნიშვნელოვანია, ასევე, ყურადღება მივაქციოთ მაცივრის მდებარეობას:
- თუ მაცივარი მზის პირდაპირ სხივებთან ან ღუმელთან ძალიან ახლოსაა, გაგრილების სისტემა გადატვირთული იქნება.
- უკანა მხარეს, მაცივარს ჰაერის ცირკულაციისთვის საკმარისი სივრცე სჭირდება, წინააღმდეგ შემთხვევაში მოწყობილობის ეფექტურობა მცირდება.
როგორ მოვაგვაროთ მაცივრის პრობლემები ეტაპობრივად
- პრობლემის აღმოჩენისას, პირველი ნაბიჯია მარტივი დიაგნოსტიკა. გამორთე მაცივარი რამდენიმე წუთით და შემდეგ თავიდან ჩართე. ზოგჯერ, ელექტრონული სისტემის გადატვირთვა საკმარისია.
- შეამოწმე, ხომ არ არის მაცივარი გადატვირთული. თუ პროდუქტები ძალიან მჭიდროდ არის განლაგებული, ცივი ჰაერი ვერ ცირკულირებს სწორად. ასევე, ყურადღება მიაქციე შიდა ჰაერის არხებს – თუ ყინულით არის დაფარული, აუცილებელი იქნება მაცივრის სრული გალღობა.
- არ დაგავიწყდეს კონდენსატორის გაწმენდა. მაცივრის უკანა ან ქვედა ნაწილში მდებარე ხვეულებში, დროთა განმავლობაში, მტვერი გროვდება, რაც გაგრილების პროცესს აფერხებს. მოწყობილობის გამორთვის შემდეგ მათი ფრთხილად გაწმენდა ეფექტურობას მნიშვნელოვნად აუმჯობესებს.
რას უნდა მიაქციო განსაკუთრებული ყურადღება
- თუ საყინულე კამერა მუშაობს, მაგრამ მაცივრის განყოფილება არა, შესაძლოა ჰაერის გამანაწილებელი ვენტილატორის პრობლემა იყოს. ასეთ შემთხვევაში, ცივი ჰაერი ვერ აღწევს ზედა ნაწილამდე.
- უცნაური ხმები, ხშირი ჩართვა-გამორთვა ან მუდმივად მომუშავე კომპრესორი უკვე უფრო სერიოზულ პრობლემაზე მიუთითებს.
- თუ მაცივარი მუშაობს, მაგრამ საერთოდ არ აციებს, შესაძლოა ამას ფრეონის გაჟონვა იწვევდეს.
როდის არის პროფესიონალის ჩარევა აუცილებელი
არსებობს ნიშნები, რომელთა იგნორირებაც არ ღირს.
თუ მაცივარი საერთოდ არ ირთვება, გამოსცემს ძლიერ და უჩვეულო ხმებს, ქვედა ნაწილში წყალი გროვდება ან ელექტროენერგიის მოხმარება მკვეთრად გაიზარდა, უმჯობესია, დაუკავშირდე სერვისცენტრს.
ფრეონის დამატება, კომპრესორის შეცვლა ან ელექტრონული დაფის დიაგნოსტიკა სპეციალურ ცოდნას და აღჭურვილობას მოითხოვს. დროული რეაგირება კი უფრო მცირე ხარჯთან არის დაკავშირებული, ვიდრე პრობლემის გადავადება.
როგორ ავიცილოთ პრობლემები მომავალში
მაცივრის რეგულარული მოვლა მნიშვნელოვნად ამცირებს გაუმართაობის რისკს. მაცივრის პერიოდული გაწმენდა, ტემპერატურის სეზონური რეგულირება და კარის რეზინების შემოწმება მარტივი, მაგრამ ეფექტური ჩვევებია.
ასევე მნიშვნელოვანია, არ განათავსო ძალიან ცხელი საკვები პირდაპირ მაცივარში, რადგან ეს ტემპერატურულ ბალანსს არღვევს.
როგორც ხედავ, თუ მაცივარი არ აციებს, აუცილებელი არ არის მაშინვე ახალი მოწყობილობის ყიდვა. ხშირად, პრობლემა მცირე დეტალშია და მის მოგვარებას საკუთარი ძალებითაც მოახერხებ. თუმცა, თუ საქმე ტექნიკურ ნაწილს ეხება – პროფესიონალი დაგეხმარება.
მსგავსი პრობლემები, შესაძლოა, შენს სარეცხის მანქანასაც ჰქონდეს. ამისთვის, თვალი გადაავლე ექსტრას ბლოგს და გაიგე, როგორ იმოქმედო. ხოლო თუ ახალი მაცივრის ყიდვა გადაწყვიტე დაათვალიერე ექსტრაზე, სადაც ყოველთვის მრავალფეროვანი არჩევანი და საუკეთესო ფასები გეგულება.
