რობოტი მტვერსასრუტი თანამედროვე ტექნოლოგიებს შორის გამორჩეულია, რადგან ამ მოწყობილობამ სახლის დალაგების პროცესი თითქმის შეუმჩნეველ პროცესად აქცია. არ გიწევს ხელით ტარება და ენერგიის ხარჯვა, შეგიძლია დისტანციურად მართო ტელეფონში გადმოწერილი აპლიკაციით.
მიუხედავად პოპულარობისა, ზოგიერთ ადამიანს მაინც უჩნდება კითხვები: ნამდვილად ღირს თუ არა მისი ყიდვა ან რამდენად ეფექტურია?
ამ ბლოგში 5 მნიშვნელოვან რჩევას გაგიზიარებ, რაც აუცილებლად უნდა გაითვალისწინო რობოტი მტვერსასრუტის ყიდვამდე.
დიდი თანხის დახარჯვა აუცილებელი არ არის
რობოტი მტვერსასრუტის ყიდვისას აუცილებლად ბევრი ფულის დახარჯვა არ გჭირდება. რა თქმა უნდა, პრემიუმ მოდელები უფრო მეტ სმარტ ფუნქციას და დამატებით კომფორტს გთავაზობს, მაგრამ საშუალო სეგმენტშიც მოიძებნება საკმაოდ ეფექტური ვარიანტები, რომლებიც ყოველდღიური წმენდისთვის სრულიად საკმარისია. მთავარია სწორად განსაზღვრო რა გჭირდება.
თუ პატარა ან საშუალო ზომის ბინაში ცხოვრობ და განსაკუთრებული მოთხოვნები არ გაქვს, შედარებით დაბალბიუჯეტიანი მოდელიც სრულად დააკმაყოფილებს შენს საჭიროებებს.
ყურადღება მიაქციე მოპის ტიპს
თუ გინდა, რომ რობოტი მტვერსასრუტი მხოლოდ მშრალი წმენდით არ შემოიფარგლოს და სველი წმენდის ფუნქციაც ჰქონდეს აირჩიე მოწყობილობა სველი წმენდის ფუნქციით. ასეთია, მაგალითად, Princess 338902.
დააკვირდი რა ტიპის მოპი აქვს რობოტ მტვერსასრუტს:
- ზოგი მოდელი, უბრალოდ, ნესტიან ტილოს მოატარებს იატაკზე, რაც მსუბუქი წმენდისთვის გამოდგება, მაგრამ რთულ ლაქებს ვერ უმკლავდება.
- უფრო ძვირადღირებულ მოდელებს აქვთ ვიბრაციული ან მბრუნავი მოპის სისტემა, რომელიც ბევრად ეფექტურად წმენდს ზედაპირს.
თუ სახლში კაფელი ან ლამინატი გაქვს მაშინ მოპის ტექნოლოგიას განსაკუთრებული ყურადღება უნდა მიაქციო.
აირჩიე რობოტი მტვერსასრუტი დამტენი სადგურით
ბევრ რობოტ მტვერსასრუტს კომპლექტაციაში ახლავს დამტენი სადგური. ის საკმაოდ დიდი ზომის არის და სახლში დამატებით სივრცეს მოითხოვს. თუ პატარა ბინა არ გაქვს, ნამდვილად ღირს მისი არჩევა. რატომ?
- სადგურებს აქვს მტვერსასრუტის მტვრისგან დაცლის ავტომატური სისტემა, ასევე, რობოტის მოპის ავტომატურ შევსების ფუნქცია.
- ბევრ მათგანს მოპის წმენდის ფუნქციაც აქვს დასუფთავების დასრულების შემდეგ.
სხვა შემთხვევაში, მტვერსასრუტის დაცლა და გასუფთავება თავად მოგიწევს.
სივრცის მცირე მომზადება ეფექტურ შედეგს იძლება
რობოტი მტვერსასრუტი დამოუკიდებლად მუშაობს, მაგრამ ეს არ ნიშნავს, რომ საერთოდ არ სჭირდება შენი დახმარება. სანამ ჩართავ, სასურველია იატაკიდან აიღო კაბელები, პატარა ნივთები ან მსუბუქი ხალიჩები, რომლებმაც მტვერსასრუტს შეიძლება გზაში შეუშალოს ხელი გადადგილებისას. ასევე, მნიშვნელოვანია პერიოდულად ჯაგრისებისა და სენსორების წმენდა.
ეს მცირე მომზადება და მოვლა მნიშვნელოვნად აუმჯობესებს მის მუშაობას და თავიდან აგარიდებს გაჭედვას ან გაუთვალისწინებელ პრობლემებს.
რობოტი ჩვეულებრივ მტვერსასრუტს სრულად ვერ ჩაანაცვლებს
მიუხედავად იმისა, რომ რობოტი მტვერსასრუტი ყოველდღიური სისუფთავის შენარჩუნებისთვის შესანიშნავია, ის სრულად ვერ შეცვლის კლასიკურ მტვერსასრუტს. კუთხეები, რბილი ავეჯი, კიბეები ან ღრმა წმენდა კვლავაც ტრადიციული მოწყობილობის საქმეა.
რობოტი საუკეთესოა რეგულარული, ზედაპირული წმენდისთვის, რაც საშუალებას გაძლევს იშვიათად და ნაკლები ძალისხმევით გამოიყენო ჩვეულებრივი მტვერსასრუტი.
ასე რომ, მას უნდა შეხედო არა როგორც ჩანაცვლებას, არამედ როგორც დამხმარე მოწყობილობას, რომელიც შენს ყოველდღიურ რუტინას მნიშვნელოვნად გაამარტივებს.
