ვაჟა დანელია - ოთარ ქორქია

ტიპი: ქართველი ავტორების წიგნები

გვერდების რაოდენობა: 128

საბჭოთა კალათბურთში ვერც იხსენებდნენ ისეთ სპორტსმენს, რომელსაც მოთამაშეებსა და მწვრთნელებს შორის ოთარ ქორქიას მსგავსი ავტორიტეტი ჰქონდა. ფიზიკურად ძალიან ძლიერი, კარგად მხტომელი და სწრაფი ქართველის ფარქვეშ შეჩერება შეუძლებელი იყო. ევროპის 1947 წლის ჩემპიონატის „საუკეთესო სნაიპერს“ პრაღის ერთ-ერთმა გაზეთმა „კალათბურთის ევერესტი“ უწოდა.

1962 წლის 29 ივნისს თბილისის დინამოს კალათბურთელებმა ევროპის ყველაზე პრესტიჟული საკლუბო ჯილდო – ჩემპიონთა თასი მოიგეს. ჟენევაში გამართულ ფინალში დინამოელებმა მადრიდის რეალს სძლიეს!

იმ დინამოს მთავარი მწვრთნელი ქართული კალათბურთის ლეგენდა ოთარ ქორქია გახლდათ.

რეალთან გამარჯვებას ემიგრანტი ქართველი მწერალი გრიგოლ რობაქიძეც დაესწრო, რომელმაც დისადმი გაგზავნილ წერილში კალათბურთელთა დამრიგებელზე თქვა: „გამარჯვების ნახევარი თითქმის გამარჯვებულთა ხელმძღვანელს უნდა ვაკუთვნოთ. ოთარ ქორქიას, ვთქვათ პირდაპირ, მათს სულისჩამდგმელს. დიდი ოსტატი ყოფილა, დიდი! მატჩის დროსაც ამა თუ იმ დარიგებას აძლევდა აღზრდილებს. აღსანიშნავია ესეც: ყოველ მათგანს ექცეოდა როგორც ნამდვილი ძმა, უფროსი ძმა“.

1951 წელს, საფრანგეთში გამართული ევროპის ჩემპიონატის შემდეგ, როცა ოთარ ქორქიამ და მისმა თანაგუნდელებმა ზედიზედ მეორედ მოიგეს ოქროს მედლები, საბჭოეთის ნაკრების ქართველ ლიდერს ჟურნალისტებმა „ულვაშიანი ჯენტლმენი“ შეარქვეს.

გაივლის მეოთხედი საუკუნე და საბჭოთა კავშირის ნომერ პირველი სპორტული გაზეთი სავეცკი სპორტი ქვეყნის ყველა დროის საუკეთესო კალათბურთელის გამოსავლენად სპეციალურ გამოკითხვას მოაწყობს. უძლიერესად ოთარ ქორქიას აღიარებენ, ჩვენი სპორტის ლეგენდას და მის კიდევ ერთ ლამაზ მეტსახელს თუ დავესესხებით, „ქართული კალათბურთის ბერმუხას“.

…ცხოვრება სიურპრიზებითაა სავსე. ჯერ კიდევ სკოლაში სწავლის დროს ოთარ ქორქია ორჯერ გახდა საბჭოთა კავშირის ჩემპიონი… ბადროს ტყორცნაში! 1939 წელს, როსტოვში, პირველობა სულაც საკავშირო რეკორდით მოიგო – 55 მეტრი! სპორტის ამ სახეობაში მას უდავოდ დიდი მომავალი ელოდა, მაგრამ გულშემატკივრებმა ის კალათბურთელად გაიცნეს, ლამაზ, ძლიერ და ტიტულიან მოთამაშედ.