სიმართლე თუ მოქმედება?

არც მთლად სიმართლის თუ მოქმედების დონეზე მარტივადაა ყველაფერი. ამ თამაშში არის 5 სხვადასხვა ტიპის კარტი – სიმართლე, მოქმედება, ჯგუფური ქმედება, ჩამშვები კარტი და შოტი. 1. Truth – სიმართლის კარტი. კლასიკური და გასაგები კარტი – თუ მაგას ამოიღებ მაშინ კითხულობ კარტზე არსებულ კითხვას და სცემ მართალ, პატიოსან პასუხს. თუ ისეთი კითხვაა რომ პასუხის გაცემას შოტის გადაკვრა გირჩევნია, გადაკარი. 2. Dare – მოქმედება. იღებ კარტს, კითხულობ იმ მოქმედებას რაც ზედ წერია და გიწევს შესრულება 🙂 თუ ისეთი მოქმედებაა რომ მაგის გაკეთებას შოტის გადაკვრა გირჩევნია, გადაკარი. 3. Go – ჯგუფური ქმედება. აქ უკვე ყველანი ჩელენჯდებით ერთმანეთთან. კარტი გეტყვით რაც უნდა ქნათ ყველამ ერთად. მაგალითად ან ყველამ ცალი ხელი უნდა აწიოთ და პირველი ვინც ჩამოწევს სვავს, ან შეიძლება სისწრაფეზე იყოს რაღაც და ბოლო ვინც შეასრულებს კონკრეტულ ქმედებას, იმას მოუწიოს დალევა. მოკლედ ამ კარტის წიხლი ნებისმიერს შეიძლება მოხვდეს. 4. Snitch – ჩათვალე ჯოკერი ამოგივიდა. ვისაც გინდა ირჩევ და ეკითხები – სიმართლე თუ მოქმედება. ამ დროს უკვე კლასიკური სიმართლე თუ მოქმედების სცენარით, რასაც გინდა იმას ეკითხები ან რასაც გინდა იმ მოქმედებას ავალებ. თუ შენი მსხვერპლი ვერ შეასრულებს შენს ნათქვამს, მაშინ სვავს. 5. Shot – შოტი. ეს კარტი თუ ამოგივა განსახილველიც არაფერია – უბრალოდ სვავ. კარტების ამოღების პრინციპი შემდეგია: წრეში ზიხართ და კარტებს იღებთ ერთმანეთის მიყოლებით, რიგ-რიგობით. საათის ისრის მიმართულებით თუ საწინააღმდეგოდ მაგას მნიშვნელობა არ აქვს, მთავარია რომ რიგითობის პრინციპი გქონდეთ ერთმანეთის მიყოლებით. კარტს აქვს მეორადი ფუნქციაც – კუთხეში რომ დააკვირდე ახატია ყვავი, გული, ჯვარი ან აგური და აქვს შესაბამისი ნიშანი. ეგ იმისთვისაა რომ ამავე კარტით ჩვეულებრივი კარტის თამაშიც შეგეძლოს.