ლორა ბოჩაროვა უაღრესად მრავალმხრივი და საინტერესო თანამედროვე შემოქმედია. ლორა განსაკუთრებული სუბკულტურული მიმართულების — როლური მოძრაობის — ერთ-ერთი სულისჩამდგმელი და მთავარი ფიგურაა. ეს მოძრაობა რუსეთში ტოლკინისტიკის სახით გავრცელდა, შემდეგ მისი მასშტაბი გაფართოვდა და ამჟამად მსოფლიო ლიტერატურისა და ისტორიის ყველა სფეროს შემოქმედებით ათვისებას გულისხმობს. ლორა როლური თამაშების ოსტატია, რაც იმას ნიშნავს, რომ მისი ხელმძღვანელობით სხვადასხვა თემატიკის ათზე მეტი როლური პროექტი განხორციელდა. გარდა ამისა, ის სამი როკ-ოპერის თანაავტორი და საავტორო-სიმღერის, ფოლკ-როკის, როკ-ბალადისა და მიუზიკლისაგან შემდგარ ძნელადგანსასაზღვრ სტილში დაწერილი ასზე მეტი კომპოზიციის ავტორია. გამოქვეყნებული აქვს სიმღერების ათამდე ალბომი. წერს პროზას, ლექსებსა და პუბლიცისტიკას, მუშაობს მხატვრულ და ფოტოპროექტებზე. გამოცემული აქვს სამი წიგნი. ლორას ჯადოსნურ სამყაროში შებიჯება მსოფლიო ლიტერატურის უამრავი შედევრის გაცნობისა თუ ხელახლა გადაკითხვისაკენ გვიბიძგებს, სხვადასხვა ეპოქისა და ქვეყნის ისტორიაში, კულტურასა და რელიგიაში ჩაღრმავების საბაბს გვაძლევს. ეს სამყარო მოგვაგონებს ჰერმან ჰესეს „ტრამალის მგელში“ აღწერილ მაგიურ თეატრს, სადაც უამრავი კარია და თითოეულ კარს მიღმა განსხვავებული საოცარი სინამდვილეა. „ზეთისხილის წვენი“ ლორა ბოჩაროვას თვალით დანახულ წმინდა სებასტიანეს ცხოვრების გზას მიჰყვება. მშვენიერ დიდგვაროვან ფლავიუსს ბრწყინვალე სამხედრო კარიერა, დიდება, სიმდიდრე და თვით იმპერატორის ფავორიტობაც კი ელოდა, მაგრამ მისი ცხოვრება ერთმა მოვლენამ მთლიანად შეცვალა: შუადღის მზით გავარვარებულ ვენახში მას უცხო ღმერთის ხმა ჩაესმა, რომელსაც ფლავიუსი მას შემდეგ მსახურებდა და თავი უნაშთოდ შესწირა.„ზეთისხილის წვენი“ მატერიაზე სულის გამარჯვების ამბავს მოგვითხრობს.