ჟანრი: იგავ-არაკები

გამოცემის წელი: 2021

ენა: ქართული, ინგლისური

აღორძინების ეპოქის (XVI – XVIII სს.) ქართულ მწერლობაში დიდაქტიკურ-მორალური ეპოსი უმთავრესად იგავ-არაკების სახით ვითარდება. ამ დროს ქართულად უთარგმნიათ მსოფლიო იგავ-არაკული ჟანრის ისეთი შედევრები, როგორებიცაა: „მეფეთა სალარო“, „მელის წიგნი“, „ქილილა და დამანა“, „სინდბადი“, „იგავნი ეზოპესნი“ და სხვა. იგივე ჟანრი წარმოდგენილია ქართული ორიგინალური მწერლობის შედევრით – „სიბრძნე სიცრუისა“, რომელიც სულხან-საბა ორბელიანის კალამს ეკუთვნის.

ხსენებულ იგავ-არაკთა უმრავლესობა დღესაც არ კარგავს მნიშვნელობას. მაგრამ აქვე უნდა აღინიშნოს, რომ ძველი თარგმანები რთული, მძიმე ენით არის შესრულებული და თანამედროვე მკითხველისთვის ძნელი გასაგებია.

საჭირო გახდა იგავების შერჩევა, გამართვა-გადმოკეთება და თანამედროვე ენაზე დამუშავება, რათა ეს იგავ-არაკები ხელმისაწვდომი გამხდარიყო მოზარდი მკითხველისთვის.

ასევე საჭიროდ ჩავთვალეთ იგავ-არაკები მხატვრულად გაგვეფორმებინა, რაც უფრო თვალსაჩინოს გახდიდა მათ შინაარსს.

თითოეულ იგავ-არაკს დავურთეთ ინგლისური თარგმანი, რაც ხელს შეუწყობს მოზარდს ინგლისური ენის შესწავლაში.