კოკა არჩვაძის „ჩინური დღიური“ შორეულ ქვეყანაში უგზო-უკვლოდ გაუჩინარებული ძმის მოსაძებნად წასულ ქართველი ახალგაზრდა კაცის ამბავს გვიამბობს. გამომძიებლის უჩვეულო ამპლუაში შემთხვევით აღმოჩენილი ირემაძე ცდილობს, დროის მცირე მონაკვეთში დაადგინოს, სად შეიძლებოდა გამქრალიყო უმცროსი ძმა, რომელიც, როგორც მისივე დღიურიდან ჩანს, უკვე დაკარგულად გრძნობდა თავს.

ჰონგ-კონგის გიჟური რიტმი, უსასრულო, ერთმანეთის მსგავსი უბნები, უცხო კულტურა და ადამიანები, დავიწყების უსუსური მცდელობები... ირემაძე ფეხდაფეხ მიჰყვება ქაოსურ დღიურში ამოკითხულ არეულ აზრებს და სულ უფრო უკეთ ესმის ძმის, მისი სურვილის, იპოვოს ნაპირი, რომლის მიღმაც არაფერია ზღვისა და უსასრულობის გარდა.