ჟანრი: პოეზია

ავტორი: ლევან სამხარაული

გამოცემის წელი: 2021

ენა: ქართული

ლევან სამხარაული დაიბადა 1980 წლის 24 მარტს, ყვარელში. მას, როგორც პროფესიით იურისტს, წარმატებული კარიერა ჰქონდა. 24 წლის ასაკში დაინიშნა იუსტიციის სამინისტროს ექსპერტიზისა და სპეციალურ გამოკვლევათა ცენტრის ხელმძღვანელად.

2004 წლამდე სასამართლო-საექსპერტო ფუნქციები სხვადასხვა უწყებაში იყო გაბნეული, რაც ამ სფეროს განვითარებას, მიუკერძოებლობას და ფუნქციონირებას ხელს უშლიდა.

ლევან სამხარაულის მიერ განხორციელებული რეფორმების შედეგად შეიქმნა ახალი უწყება, რომელიც ამჟამად ექსპერტიზის დარგში ყველაზე ავტორიტეტული საერთაშორისო ორგანიზაციის – სასამართლო ექსპერტიზის დაწესებულებათა ევროპული ქსელის ENFSI სრულუფლებიანი წევრია.

საზოგადოებისთვის ლევან სამხარაულის სახელი უკავშირდება სსიპ ლევან სამხარაულის სახელობის სასამართლო ექსპერტიზის ეროვნულ ბიუროს, რომელსაც მისი სახელი გარდაცვალების შემდეგ, 2006

წელს მიენიჭა.

ცოტამ თუ იცის, რომ წარმატებული პროფესიული კარიერის მიღმა, ლევანის ცხოვრების განუყოფელი ნაწილი იყო ხელოვნება და თავადაც ბავშვობიდანვე ავლენდა შემოქმედებით ნიჭს.

გარდაცვალების შემდეგ, ოჯახის წევრებმა აღმოაჩინეს ლევანის პირადი დღიური, რომლის პირველ ნაწილში არტურ რემბოს, პოლ ელუარის, შარლ ბოდლერის, პოლ ვერლენის, ვიქტორ ჰიუგოს, ვალერიან გაფრინდაშვილის, ჰაინრიხ ჰაინეს, პაოლო იაშვილის, სერვანტესის შემოქმედებიდან ამოწერილი მისი საყვარელი ნაწყვეტებია თავმოყრილი.

დღიურის მეორე ნაწილში საკუთარი ლექსები და ჩანახატებია, რომლებიც ლევანმა 19-20 წლის ასაკში დაწერა. „ამ ნაწილში დავწერ ჩემს შეთხზულ ლექსებს, მოთხრობებს, ჩანახატებს, საერთოდ რას ვფიქრობ, არ ვარ არც პოეტი, არც მწერალი, მაგრამ რაღაც იდეები ყველას აწუხებს...“ წერდა ლევანი დღიურში.

ბავშვობიდან ხელოვნებით გატაცებული ლევანი თავად ხატავდა მხატვრული ტექნიკისა და განათლების გარეშე. თბილისის სახელმწიფო უნივერსიტეტის იურიდიული ფაკულტეტის წარმატებული სტუდენტი იმდენად გაიტაცა ხატვამ, რომ ერთი პერიოდი პროფესიის შეცვლაზეც კი დაფიქრდა.

წიგნში თავმოყრილია ლევანის ნახატები, ლექსები და ჩანახატები, რომლებშიც ჩანს მისი შინაგანი სამყარო და მისი სწრაფვა ცხოვრებისეული სიღრმეებისადმი.

2005 წელს ლევან სამხარაული 25 წლის ასაკში გარდაიცვალა, ყვარელში.